波兒大戰血洗兔爸手

呢件事已經發生喺十日前, 原本唔打算POST出嚟, 不過, 見好多時有兔友都會為咗俾兔兔咬親/抓親少少都覺得好似好大件事, 會嬲兔兔或者唔開心等等... 我就想希望借住兔爸今次俾波兒嘅傷害同大家分享下。

事原... 有晚波兒尿咗喺啲草草上面, 攪到腳仔濕咗, 因為波兒氣力甚大, 而且細隻又易甩手, 所以我就用毛巾抱住反轉佢梳兼用毛巾抹腳底, 但整咗一陣佢就反抗要離開, 我當然唔會俾佢走啦~ 但佢實在太大力, 我又怕整親佢, 結果俾佢走甩咗, 兔爸就即刻抱起佢, 波兒當然係極力反抗, 結果... 兔爸嘅手得出三條血痕, 即使抹過同搽咗透明膠布, 啲血都仲係繼續流, 攪咗好耐先止倒血......

止咗血之後留低嘅血痕




但... 兔爸冇因為咁而嬲咗Boyee, 亦冇唔開心, 因為佢明白到, 兔兔係唔喜歡受約束, 更加唔喜歡俾人抱, 佢要爭紥離開, 完全因為要保護自己, 而佢亦都冇心去傷害兔爸。其實... 即使平時Cookie同Boyee都好鍾意無啦啦咬兔爸, 但兔爸一樣會用包容嘅心去原諒佢哋, 因為, 我哋係佢哋嘅爸爸媽媽, 仔女做錯事又計得幾多呢??

以上... 希望各位曾經歷或將來會遇到兔兔咬/抓痛自己, 都會用包容嘅心去對待佢哋, 唔好再覺得兔兔點解會咁對我?? 其實兔兔又點會去專登傷害你呢????

另外, 見好多兔友都會問, 兔兔係咪真係咁唔鍾意俾人抱? 其實...絕大部份嘅兔兔都唔鍾意俾人抱, 如果要做一啲非抱不可嘅事, 例如: 剪甲, 梳毛... 可以用春卷式嘅方法去抱, 咁就會減低兔兔無意傷害自己嘅機會, 因為唔想俾兔兔傷害自己, 並唔係希望佢哋會懂得去唔傷害我哋, 而係我哋自己要懂得如何去防範俾兔兔傷害, 即使真係俾兔兔傷害, 亦應該懂得體諒佢哋, 咁樣先可以同兔兔建立良好嘅關係。

原帖由 fishbu 於 2010-4-30 03:02 發表
比佢地咬/整親唔會唔開心唔會嬲,,仲驚佢地唔舒服tim!
但好似狗仔咁,,佢地有時都會咬人,,唔通你由得佢咬= =?
兔兔掙扎想保護自己咬我唔緊要, 最怕係養成壞習慣:020:
之前睇animal planet D program, 有個節目係幫 ...

我哋嬲佢唔代表冇罰佢, 我都會即時鬧佢, 同埋要罰佢坐監, 只係我哋唔會為咗咁而嬲佢或唔開心~!!

其實兔兔本身好有主見, 佢哋唔鍾意人類做一啲佢唔鍾意嘅嘢, 自然就會掙扎, 當然唔係所有兔兔都一樣, 但如果你想佢乖乖咁俾你抱住剪甲或者梳毛, 而兔兔嘅性格係剛強嘅話, 唯有用春卷法係最好, 不過, 少數兔兔係唔WORK咖~ 就好似波兒咁, 春卷法都走得甩, 死未??

原帖由 connie0909 於 2010-4-30 02:14 發表
嘩..好恐怖啊!!!:022: 睇到都痛...
我諗佢唔想你抱個陣就唔好再去抱佢..等佢平靜小小先...
因為我冇試過咁....我兔兔鐘意人抱..

我哋平時好少抱佢, 只係嗰日佢隻腳濕晒, 所以局住要抱佢抹~!! 佢啲指甲好鬼尖利, 我試過抱住佢嗰陣放佢落地, 佢隻腳係咁易"HI"過我大脾已經可以有一條滕條痕, 仲係腫腫哋嗰隻, 但佢啲指甲又唔長, 唔剪得, 有兔友叫我用指甲挫, 但佢啲指甲好細粒, 拎唔住嚟挫, 依家唯有冇乜必要都唔會抱佢, 梳毛都係要佢瞓喺地先梳~!!

其實兔爸呢三條痕係如同俾人用大界刀界咗三下咁, 真係勁驚~!!

原帖由 kikocheese 於 2010-4-30 02:38 發表



我上次就係俾KOBI抓到好似你幅相咁,不過係係大脾一大條,就算而家過左咁耐都仲有,不過個時我都好似你咁,無嬲到佢,因為知佢係唔鍾意先至走,我初初都無為意到,係幫佢剪完之後發覺那那地先知,但係個時反而仲傻傻下 ...

兔爸三條唔止痕咁簡單, 其實係深到可以"MARK"開睇倒入面啲肉, 我嗰日見倒都心寒, 有點似割脈自殺~!!#^15^#

原帖由 smallsuishan 於 2010-4-30 10:11 發表
波兒 曳曳豬丫!!!
何Hill大哥叫你乖D丫~~

呢個星期佢已經乖咗啲, 之前嗰個星期唔知做乜成日搬廁所, 仲衰到係兔爸一返咗工先嚟搬, 唔知係咪專登激我 >.<
俾我鬧咗幾日, 終於搬少咗, 之前一日幾次, 依家間唔中一次, 我就嚟要扣實個廁所咖喇~!!!!!

Hill Hill, 你真係要幫我教下你個契妹點樣可以好似你咁乖啊~^^

原帖由 天才文仔 於 2010-4-30 10:17 發表
有日睇報紙廣告見到"快圖尾"有款動物磨甲器唔知有無用
類似咁既樣:

咁得意嘅?? 不過真係唔知兔兔用唔用得, 始終佢哋啲手指腳指唔同貓貓狗狗咁~!!!!

原帖由 katy 於 2010-4-30 10:21 發表
BB D指甲係會利/尖D，呀B細個成日都抓到我損哂. 兔爸仲話我咩事界手.........#^37^#
而家呀B青年期指甲平左，抓都唔會話腫加流血.

最慘係BB要成日捉佢抺腳冇得避.

我養三隻兔兔都係由BB開始養, 但都冇波兒啲指甲咁尖利, 就連用手輕輕摸下都覺得好似玩緊把刀咁, 佢真係非一般兔兔嘅指甲, 仲要係黑色, 所以要等佢長啲先敢同佢剪。

原帖由 coumpnet 於 2010-5-3 14:29 發表
系我一定打瓜隻衰兔....................

你咁樣回我個POST, 即使你只係隨便講講, 也証明你跟本冇用心去睇我個POST, 唔明內裡嘅真正意義, 同埋, 唔好隨便講呢啲說話, 不論對動物定對人, 有時... 咁大個人, 說話要先經過大腦, 冇意義嘅說話唔講也罷了。