淚線問題

請問各位,兔兔3月中開始,眼睛有問題,睇咗醫生, BETTY話,兔兔流眼水有好多原因,但係到依家仲滴緊眼藥水,兔兔又未好返,BETTY話佢有可能係牙仔問題影響淚線,最壞可能牙仔頂住淚線,引致淚線斷咗,可能駁唔返...我又唔敢同佢照X光,請問各位,萬一兔兔淚線真係斷咗,係咪好麻煩呀?

我見到兔兔,只能夠用棉花幫佢印乾D淚水,希望各位可以比D意見我,同佢照X光,還是有其他辦法???

如果DR.BETTY都建議兔兔做X-RAY既話,最好都係做啦~
始終要照X-RAY先睇到係咪因為牙仔頂住淚線,
其實都唔駛咁擔心既,醫生會先評估兔兔既狀況先會同佢做
主人唔好咁擔心,兔兔見到你唔開心,佢都會唔開心架
最緊要聽下醫生有咩意見先,加油呀~
希望兔兔早日康復

醫生意見,我地要聽,,儘早醫治,我地都希望見到兔仔健康生長.

照x光 最清楚發生咩事...   
e加乜都唔知 都唔敢比藥  ....    就算比方法可能都係治標唔治本

照x光 睇下發生咩事仲好 喇  #^54^#

寧可信其掂，不可全不試。

照下，好過治標唔治本；起碼深入到問題所在。

點解唔敢同佢照X光？
照X光都唔係解決方法，只係搵出個問題所在
照左先知有咩有效既方法
放心，睇開兔兔既醫生們都係好專業的#^65^#

唔知樓主帶左兔兔去睇醫生未呢

今朝起身,幫佢滴眼藥水,發現已經流眼水情況已經擴散到左眼....我已經打咗電話比診所,諗住聽朝一日去睇e生,叫e生幫佢照x光,誰不知佢哋覆我,full晒booking,要再約時間,唔知會唔會真係淚線閉塞,我依家係驚佢淚線斷咗,以後都係咁,我好無助....唔知各位知吾知,係咪如果右眼有事,根住會到左眼呢?D細箘係咪會走到另外一面,如果係牙仔有事,影響係咪得一面有事,還有兩隻眼都有事呀?我見佢右眼開始有好轉,依家又輪到左眼....唉,點解佢多災多難....做我呢個主人真係失敗,佢有事我又幫唔到佢....點算呢?

e加盡量幫兔兔清潔好眼仔 .. 因為成日比淚水濕住眼仔都唔係好好  
如果真係細菌..  眼水有細菌.. 有機會影響埋右眼都唔出奇嫁..   好似人甘..
仲有兔仔成日幫自己洗面面會掂埋眼仔  你都要保持返個地下清潔    ..
佢手仔乾淨..   因為都會掂到眼仔嫁嘛 ...   

放心勒...  兔兔一定冇事既...     
你頭像2隻兔仔真係好鬼可愛..     好襯#^39^#

樓主,你3月中去睇醫生時已經要照X光啦!!
一直以黎佢都冇好轉,其實你早應該要做
點解等到依家2個月都仲問緊呢個問題??
依家仲要由右眼到左右眼都有事,再拖落去受苦既只係兔兔
你係愛佢錫佢既話,就早早要帶佢去接受適當既治療
而唔係一拖再拖!!
由出POST到依家都2日,兔友都有叫你去照X光啦~
我地唔係醫生,好多野都教唔到你~

如果DR.BETTY FULL左,你有冇問過其他醫生呀?
佢果度有3,4個醫生架喎,唔係淨係DR.BETTY先識睇兔兔
你再打去問問啦,再拖兔兔既情況就越壞,相對金錢同康復時間越多
最後都係個句,病向淺中醫,唔好要兔兔受苦:016:

我諗你哋誤會我意思,我發現兔兔有事,已經第一時間帶佢睇E生,由3月睇到依家, 一開始滴眼藥水,滴左兩個禮拜,之後仲未好番,同佢轉睇DR. BETTY, 之後仲加埋食藥同眼藥水,過左兩個禮拜覆診,都仲未好番, 後來種箘等報告,今個用7號先有報告出,3個星期再覆診,依家一直滴,本來3個禮拜,即係28號先覆診, 但係到今日,兔兔都未好番,所以先即刻約E生,問佢可吾可以照X光,點之佢哋(九龍動物醫院),話要我自己同E生約時間,等E生比意見係咪應該照X光,因為照X光,有一定風險.
九龍動物醫院最快比我BOOKING時間係聽日,唔係我唔想同兔兔睇E生,係醫院本身都FULL晒BOOKING,我見到兔兔病緊,我都好心痛,寧願受苦係我呢....:050:

我鬆毛都有呢個情況發生呀, 鬆毛係我係一年前接佢返黎養既, 可憐既鬆毛因為之前既生活唔係咁理想, 攪到冇得食兔仔既主要食糧----- 乾草, 令到佢d牙仔太長, 照x-ray後發現牙仔頂住條淚腺, 導致佢經常流眼水及分泌物, 醫生話建議佢全身麻醉剪牙仔,但始終鬆毛8歲了, 全身麻醉會有一定既風險的, 但如果唔做呢個手術既話, 日後既問題可能會梗加嚴重, 或者發現得太遲會死......!! 諗左好耐, 好驚8歲既佢會撐唔住, 醒唔返, 好擔心, 但問題始終都要解決, 而家問題發現得早, 早d解決仲好過後果嚴重時想解決都解決唔到, 最終都係帶左佢去做呢個小手術!
剪牙手術好成功, 但鬆毛淚腺問題仍然未解決, 醫生話可能係佢天生牙根生得低頂住淚腺, 只可以keep住滴眼水等佢舒緩!
後來我轉去睇紅磡獸醫診所, 醫生幫佢通淚腺, 通淚腺好痛, 係隻眼度夾硬插條管入去通, 痛到鬆毛係咁叫, 通完後情況的確係有好轉, 但只維持到幾日, 一星期後覆診又要再通過, 我實在唔忍心睇住佢每星期都要咁痛苦, 後來我再轉去睇dr hugh, dr hugh話我要做既已經做哂, 可以幫到佢既辦法都已經試哂, dr hugh叫我勤啲幫佢清潔眼仔就ok了

原帖由 win_sorb 於 2011-5-18 09:11 PM 發表
我鬆毛都有呢個情況發生呀, 鬆毛係我係一年前接佢返黎養既, 可憐既鬆毛因為之前既生活唔係咁理想, 攪到冇得食兔仔既主要食糧----- 乾草, 令到佢d牙仔太長, 照x-ray後發現牙仔頂住條淚腺, 導致佢經常流眼水及分泌物,  ...

哎丫 ><  通淚線要甘通嫁..      做主人既你一定好心痛    陰公豬><
甘e加鬆毛情況點丫 ...

佢雙眼每日都好多分泌, 要keep住幫佢清潔

咁我想問下各位兔友的經驗,係咪一定要e生決定先可以同佢照x光呀?我可吾可以要求e生同佢照x光?
照左x光,係咪可以睇到淚線同牙仔有無問題呀?有無兔友試過,可以話比我知全部的過程係點樣呀?之後,我應該點樣照顧兔兔呢?