俾個阿婆呃左 ....

放工搭完mtr就去搭小巴返屋企 ( 平時唔落雨都係小巴等人，但係一到落雨就係人等車 )，
等完一架小巴，我排第三個，突然間有一個大約40幾50歲既阿婆，篤住把遮、喘住氣同我講，
"小姐，我好辛苦，可唔可以俾我排先"，
咁我見到佢真係好似好辛苦咁，咪俾佢排囉，
雖然我聽到後面 d 人係到有說話講 (因為條隊唔係直線，而係轉彎，所以後面d人講既都聽得到)，
但係心諗是但啦，個阿婆又好似幾辛苦咁，幫得就幫 (俾左個阿婆插隊之後我已經唔敢再望後面 ... )。

上完小巴，個阿婆都同我講唔該，咁我咪微笑點頭囉。

到落車個陣，個阿婆仲行得快過我 ........
同上車前完全判若兩人 .........

真係激死我 ....

算啦~~~ 咪當讓下阿婆囉~~
我平時搭小巴
有個婆婆唔會排隊, 有車就上~~
無謂計較~

算啦~呃完就算...阿婆係o甘:056:

雖然話就話我地後生係應該要敬老,讓下d老人家..
不過有時d老人家持老賣老..
真係...........好....令到人地唔鍾意囉...= ="

唉,所以話人老精,鬼老靈囉!:059:

真係好難做，因為其實後面都已經超多人排隊，仲有大肚婆 tim...

好彩既係d人只係講幾句，如果真係鬧起交上黎都唔知點算 ...

最憎D人持老賣老
欺騙人地既同情心:052:

算啦, 老人家ma, 可能佢上左車順反條氣呢.
而且等車期間個時又下雨, 佢如果因為咁而整親的話, 都唔好呢

原帖由 casey 於 2008-7-10 01:00 AM 發表
最憎D人持老賣老
欺騙人地既同情心:052:

我以前返中學要搭van仔，朝朝d ar婆問都唔駛問就咁企係龍頭 (條龍要成5-6架小巴先載得晒ga!!)

真係佛都有火!!!