(問題+分享) 寶寶唔食草....

想同大家分享一下我既兔仔寶寶既經歷, 同埋亦都想請教下點樣tum兔仔食草...(希望大家比少少耐性睇下啦~:001: )

寶寶今年都7歲ga喇~
可以話係我老豆留低既遺物, 因為7年前係我老豆o係"完全無問過我同呀媽既意見"既情況之下就買左佢返黎~
無啦啦訓醒覺屋企多左隻兔wo! :052:
而我本身對兔仔又無任何認識,心諗佢都無性既...狗就話識認主人je~
正正因為對佢無咩好感所以我都無點理佢~:059:

過左幾日之後,我見到寶寶個碗仔無晒糧,淨係有幾粒便便係度...
見佢咁可憐咪比糧佢囉...但我又怕污糟wo,所以我就拎過第2隻碗裝比佢~
點知由個日開始...寶寶就自動自覺會去有便便個隻碗去廁所:027:
係個一刻我地全家先知道...原來寶寶好聰明ga!!!:050:

續....

自此之後,寶寶越聰明我地就越錫佢,不過可惜...我地養佢既方法係錯晒~
- 由佢細個開始我地已經一個月幫佢沖一次涼 (沖緊涼既時候寶寶好開心ga~ 不過一到吹毛就發脾氣...因為佢好無耐性~)
- 無限量咁比糧佢食 (想當年個sales淨係同我老豆講:"你比草同糧佢就得ga喇", 結果? 結果當然係令到寶寶由4個月大開始就完全唔食草啦!)
- 比好多零食 (寶寶既最愛...就係手指餅,因為係佢4,5歲既時候,我先至知道原來寶寶成日流眼水係因為d牙過長頂住左淚線,但佢又唔食草wo...我試過成個星期淨係比草佢食,但佢寧願淨係飲水...唔食野都唔肯食草:056: 到我有一次行過寵物店,見到自稱可以磨牙既日本手指餅,心諗"可以磨牙?正wo!" 結果...結果就係令到寶寶連糧都唔點食...淨係食手指餅):054:

其間其實寶寶有時都會痾爛屎,不過第2日又無事...而我地亦都完全唔知道個嚴重性,所以一直無為意....
最終係2010年既12月29號, 寶寶已經keep住痾爛屎痾左幾日,仲痴到成個pat pat都係,
所以我呀媽就捉左寶寶去沖涼...一沖完涼, 我地發現寶寶既陰莖好似爛左咁!!!!:011:
二話不說,呀媽就叫我上網睇下大圍邊度有獸醫,由於我之前陪個個fd帶隻倉鼠去大圍珍禽異獸度睇,所以即刻打電話去~
當時係9:45,可能係個天知道寶寶情況其實好嚴重...平日full booking既診所,竟然咁岩係10:15有位!:020:

續...

去到診所,係dr.mancy負責睇寶寶 (之後先知原來佢對於細隻既動物診症係好有經驗):010:

檢查完畢,dr.mancy話寶寶既情況非常嚴重...
- 腸停,寶寶已經差唔多成12個鐘無食過野
- 門牙無左,大牙生到去面珠度(好彩無插傷)
- 牙齦發炎有"龍"
- 睪丸癌
- 反而陰莖個度,只係少少發炎,"查"藥膏就無事

好彩既係...呢d野全部都有得醫,不過要萬2蚊...
由於我地屋企真係唔太afford到呢舊錢...
咁我呀媽就喊住咁問:"如果唔醫係咪好快會死?"
dr.mancy:"其實宜家寶寶已經好痛好痛,只係佢忍住"
我呀媽:"咁兔仔一般有幾耐命?"
dr.mancy:"8-12年"
我呀媽:"咁...如果安樂死幾錢?"
dr.mancy:"安樂死大約4百蚊"

之後dr.mancy叫我地考慮一下,佢出一出去轉頭再返入黎...

呀媽一路喊,一路問我覺得點...
當下我只係覺得...寶寶宜家搞成咁,係因為我地唔識養...想當年唔係老豆買佢返黎,可能佢宜家跟緊一個好好既主人,身體好健康~雖然話兔仔得8年命...但寶寶係咁差既情況下,都生存左7年,我直覺話我知,寶寶至少可以到12-15歲,既然畢醫療費又唔係大到我地完全搵唔到...咁點解唔醫佢?

最終我地決定左醫寶寶。

不過由於佢情況太差,所以要留院3日吊鹽水,到d血液正常返,就可以做絕育+磨牙手術,而寶寶亦都好叻,3日後可以如常做手術。:010:

sorry,之前打錯日期...

寶寶既情況應該係...
2011年既1月25號 開始痾爛屎
         1月28號 去睇醫生+入院
         2月1號  做絕育+磨牙手術,下午6點出院。

之後我地照醫生所講
- 每日餵2次腸胃藥+止痛藥+抗生素
- 每日5餐,每餐25支草粉
- 將d T草剪碎,加d剪碎左既菜同少少糧,希望引佢食返草

可惜...所有野都好順利...除左食草:036:
到左2月7號第1次覆診,dr.mancy話寶寶情況大致正常,係d牙齦仲有少少發炎同埋絕育傷口未消晒腫...
佢仲教我試下將少少golden溝落d T草度吸引佢食...(溝A草就一定唔得~)

過左幾日之後...
寶寶依舊將所有草+菜揀開晒...淨係食糧,
然後就等食草粉...

所以由前幾日開始,我淨係朝早同夜晚各餵一次草粉,其餘時間就淨係比草+菜+糧佢食....
但佢都係唔食草同菜...
反而對草粉就越黎越熱愛...
但完全唔餵草粉又唔得...
一唔餵佢d便便就即刻細一半,同埋因為食野少既關係...寶寶已經瘦左好多...:016:

聽日寶寶第2次覆診喇...因為dr.mancy上次話佢既體重唔合格...
唉....但我真係唔知仲可以點樣tum佢食草....

所以真係請求咁多位兔兔主人幫幫忙...教下我...
我知道兔協之前收養左一隻8年都淨係食日本糧既兔兔,
但佢宜家去左寄養家庭之後,都慢慢食返草...所以我都打左電話去問...
點知個staff淨係叫我問返獸醫....:016:

唉....我都唔知可以點...

你試下簡D花同葉比佢睇下佢會吾會食?

唉...都係唔食....真係暈係度....:016:
所以我真係好想知道兔協個隻8歲兔兔係點改善飲食習慣...
不過個staff又唔肯幫我問.....

我覺得離不開"耐性"二字囉~~~兔協試過有兔仔比前主人遺棄,養得太差,腸胃做成永久性問題.....我諗你而家隻兔兔都可能係咁......冰封三尺,非一日之寒......

而家仲未係最壞,最起碼而家都仲可以諗有咩方法幫到兔兔,你可以為兔兔做多d功課,睇多d其它兔友點養兔,點樣tum兔兔

同埋你可以睇九龍動物醫院,佢地都睇好多兔仔,可以問下佢地意見~~

你可以每日試下比唔同既菜兔兔,睇下有無邊款,兔兔會鐘意,多d嘗試,我諗你講既8歲淨係食日本糧既兔兔,寄養家庭都應該用左好多方法,同愛去照顧兔兔

好彩寶寶佢宜家腸胃無咩問題...
我宜家都嘗試緊日日比唔同既菜佢食睇下有無邊種岩佢口味....可惜暫時仲未搵到..:047:
我都有諗住轉去九龍動物醫院....因為其實寶寶佢宜家每2,3個月就要睇一次牙仔,
不過我擔心轉左過去...個邊又無寶寶d病歷...唔知會唔會害左佢....

我都係寶寶出左事之後先識得黎呢度keep住update養兔兔既資訊~
講真...對我地d主人黎講,要比錢睇醫生事小...最心痛係睇見佢地辛苦....:020:

轉醫院好易咖咋, 你打左去九龍動物醫院同佢講寶寶既情況先, 然後再同大圍講你想轉醫院, 大圍就會fax 寶寶d 病歷去九龍動物醫院果邊咖喇, 係收1次second opinion fee囉!

加油呀, 我隻仔以前都唔中意食草, 而家中意到不得了, 其實都係不斷試唔同既草, 由oxbow轉momi轉apd, 因為apd好味, 佢就開始食多草, 然後我再慢慢轉返momi, 而家佢都好食得!!

你而家係比邊隻糧寶寶食呀? 如果係日本糧就應該慢慢轉返去oxbow 成兔糧啦, 記得轉糧唔好一次過轉晒, 溝住黎轉, 早晚一匙好喇!

見到你咁有心, 真係好感動

轉診所係冇問題的, 因為新診所會叫你搵舊診所 轉移病歷過去的.

希望寶寶會明白到你地既苦心啦, 努力啊!!

唔該晒你地呀!!!
寶寶一路都係食緊oxbow既成兔糧~
至於草...我就係見你地話apd好d~ 所以宜家買左apd既T草再溝golden, 然後每次都剪碎比佢食~

岩岩寶寶覆完診返黎~
dr.mancy話佢肥返d喇~由1.69變返1.77kg~
跟住講開草既問題...
dr.mancy話既然寶寶咁鍾意食草粉~佢叫我試下將d草粉溝落d草度wo~
一陣整比佢睇下佢o唔ok先~希望佢食啦~!:020:

香D既草會吾會都會吸引到佢 ??
我屋企D兔仔 一有香味就 跳哂上沙發癡住你

之前有篇 教你點可以令D草香D ＠＠

係?!? 等我搵搵篇野先....

其實我諗最主要原因係佢牙仔痛....所以唔太想食草...
(但明明d糧都係硬ga je...佢又食wo)
所以今日醫生再開左d止痛藥比寶寶~
同埋個姑娘就教我將d草用水浸軟先再比寶寶食~

at the end我宜家將2種草剪碎, 跟住用暖水浸軟, 再溝草粉~ (好大工程 哈哈)
不過暫時都未見佢食....:036:

加油呀 見到寶寶痛左成7年其實佢都好努力
而家情況唔係好壞  
至少佢鐘意食草粉

至於成草果度 可以整香D再試下一條一條咁放係佢嘴邊睇下佢食唔食
或者試下同佢傾計啦  
同佢講你唔食草唔會好返
只會一直痛落去
每日都好溫柔咁同佢講佢應該知道既
因為寶寶夠聰明呀麻^^

我幫唔到你D咩
只能夠替你同寶寶打氣了><

多謝你呀~!
不過佢個衰豬都仲係未肯食草...:067: