兔兔唔識跳出籠, 係籠既問題?

兔兔黎左我屋企第3日啦, 但係佢仲未識跳出籠外
我地試過用厚書自制樓梯響籠內外, 佢尋日試左好耐終於成功走出走入,
但係今日又失敗啦

我地度過個門口出口底部既高度係21CM, 咁其實係我地個籠太高既問題, 定係兔兔正常係應該識跳出黎架??

呢個係我地個籠, 唔該哂咁多位:050:

會唔會係兔兔未熟悉環境所以唔出嚟呀,
呢個高度其實就唔係太高,可能未慣啫,
遲d佢熟咗架步之後你想佢唔出嚟都幾難~~

你個兔籠鋪d野唔岩wo~應該比豬仔板or木板or咩都唔洗鋪~!
只係兔廁所要鋪野比佢的(要鋪木粒or "紫" 粒)~!
個籠門口高左d(出入經常令手腳受力好易令到兔兔生腳倉)
同埋個籠門蓋由上而下打開好危險wo~好易兔兔出入果陣屈襯整襯兔兔d手腳架(個籠門蓋最好由左而右打開的)
(因為有真實例子有人試過個籠門蓋咁樣令兔兔整屈襯d手腳)
如果你唔想轉籠的話你買條橋比佢放起門口比佢試下出入啦~睇下會唔會好d~!
(加上可以安全d比佢出入的~唔洗整襯佢d手腳)

"紫" 字我唔識打唷~請見諒~!^^

[ 本帖最後由 雪姬女 於 2009-11-23 07:38 AM 編輯 ]

希望佢真係未熟先唔出黎啦=)

唔該你=)
但係我隻兔仔未完全學識響廁所尿尿, 有時會尿左響出面,
我唔想佢掂返自己既尿會"yip"住, 所以諗住等佢學識先唔再舖木粒

其實我上網搵過D橋架, 但係太矮(得18cm)
我諗過痴幾塊紙皮響個門口, 一來俾佢當橋用, 二來又可以防止佢D手腳夾到
唔知咁樣得唔得呢..

不如你改用紙粒la,. 一樣可以教去廁所. 識左去廁所就唔使鋪哂成個籠.
驚佢出嚟夾到腳仔可以係度門包住毛巾仔.
頭一個星期最好唔好放出嚟住, 比佢習慣下個環境先.
另外, 我覺得個草架有少少高..可以去日本城/Jusco$10店, 買個人地用嚟裝調味料既架, 放籠入面用嚟裝草, 食得冇咁辛苦呀.

橋 - 你可以去q-兔廊買2塊有掛鈎的木板, 然後一條放籠入面一條放籠出面做斜路比兔兔行出行入, 係硬地上跳出跳入始終會容易令佢生腳瘡 (這是兔兔的都巿病, 很多人都有, 兔兔慢慢大, 愈重愈有機會) 除非你墊BB用的軟墊

尿尿 - 兔兔會習慣四角尿尿 (我的大細妹一隻鍾意左上角, 一隻鍾意右上角, 我見i love rxxxx的兔兔就鍾意右上角), 你多d留意安排厠所, 開頭未習慣環境會四圍呵, 慢慢會變某個角落, 你鋪木糠只會令佢習慣四圍呵, 同埋木糠會對兔兔呼吸系統唔好; 兔兔係一路食一路呵, 厠所最好放係草架下面, 方便佢企上去一路食一路呵

冬天, 小心留意保暖啦, 兔兔最適室溫係18-24度, 你可以買支溫度計放係籠邊監察, 若太凍就記得加vetbed (兔協有售和送貨) 和加大毛巾圍欄啦

[ 本帖最後由 wm20472 於 2009-11-23 10:16 AM 編輯 ]

其實兔兔超愛清潔...所以我認為你大可以咩都唔鋪..等佢知道亂痾會令自己糟糟

就會學識去廁所小便就最清潔..同埋亦可以迫主人短時間內教兔兔小便

除左廁所外, 鋪紙粒好過鋪木粒
你淨係鋪係邊位應該都 ok, 兔兔多數係邊位去~

其實我想講~
兔兔岩岩返屋企,盡量唔好攪佢喇~
得閒果陣打開個門,過幾日佢會忍唔住好奇心出黎~
千祈唔好即刻去抱佢,等佢自己行下先~~或者你坐係佢身邊~

另外想講既係,
你個籠門有少少危險,怕兔兔隻腳仔會kick住~
你可以買塊厚少少既木板仔cut到岩岩好,扣係個門度,令兔兔隻腳kick唔入d鐵~
可以參考下wesky個籠丫

兔兔個籠好大呀~
等佢習慣左就會自己出黎..
到時就禁都禁唔住佢架喇

呢個高度唔係問題, 佢習慣左环境就會自由出入

最重要係放條木板做斜路,
或用毛巾包住度門當斜路出入
以免kick腳趺跤

原帖由 sheena 於 2009-11-23 08:22 AM 發表
唔該你=)
但係我隻兔仔未完全學識響廁所尿尿, 有時會尿左響出面,
我唔想佢掂返自己既尿會"yip"住, 所以諗住等佢學識先唔再舖木粒

其實我上網搵過D橋架, 但係太矮(得18cm)
我諗過痴幾塊紙皮響個門口, 一來俾佢當 ...

唔好用紙皮呀~兔兔會食落肚架~好危險的~!

去文具舖買個細細地的膠 clip board 得唔得, 亞加力膠應該冇咁易咬gua?
我自己冇試過的, 只係突然諗到!