Miffy 絕育手記 ( 更新：11：36 11-06-2008 ）

今日6月8號係 miffy 既大日子，雖然真係非常唔捨得，但係點都要俾佢去做。
因為黎緊呢幾日都無得抱實實 miffy，所以係帶佢去診所之前，梗係要抱返夠本la !!



6月8日 星期日

10：30    去到診所，等左大約半個鐘，betty 先問我清唔清楚個手術，之後佢解釋一次風險有幾多，
                 兔仔仔會係佢二邊既旦旦都開一個小洞，將入面既睪丸拎走，之後再將洞口"痴"埋，
                 100兔兔會有3隻自己咬傷口，因為傷口會有輕微既痕癢，所以都要戴頭罩，以保安全，
                 手術後有幾滴血都係正常，可以輕輕力幫佢按實傷口止血，如果有紅腫就要即係帶返診所。
                 之後betty係張表格到填大約既費用 : 手術費550蚊、藥費300-400蚊、頭罩 40-50蚊、
                 ( 草粉因為屋企有所以無計 )，betty 寫完之後，就要我簽返名，填返電話號碼，
                 仲話一定要開住電話。3點半就可以接返 miffy 返屋企。

11：20     miffy 俾護士姐姐抱走。

13：00     準備 miffy 最愛食既白菜仔、菜心、蕃茄仔，亦都將所有用品用白醋消毒，舖好尿墊，準備功夫大功告成。

PS：betty 話而家既天氣，兔兔係袋入面會好焗好熱，所以要用一個保鮮袋入面放水，之後平放係冰箱等佢結冰，
係帶兔兔出門之前，用布包住放入袋，等兔兔可以趴住佢散熱。
各位兔友如果夏天要帶兔兔絕育�出門，都可以用呢個方法幫兔兔消暑ＬＡ。

15：30     接左miffy，va話佢好叻仔，做完手術後已經自己食d草同糧，用手餵佢都肯食。
                  va 教左我點同佢除同戴頭罩，頭三日要戴住，之後可以唔駛戴，
                  佢話如果一開始唔戴，佢舔爆左傷口既話，就要戴一個星期先可以除，
                  所以都係俾佢先戴住三日好d嚕。
                  betty 俾左抗生素、止痛藥、益生菌。所有手術費連藥費總共 $1012。
                  因為 MIFFY 要用頭罩，會令到佢食唔到盲腸便，所以如果係籠到見到有，就要執返黎俾佢食，
                  通常都係凌晨5-6點或者係下午5-6點會有。
                  另外旦旦呢幾日會因為壓力問題而會變成好似以前咁大，但係如果大到好似乒乓球咁大就要返診所。
                  過左一星期之後，旦旦就會變成一塊皮。

PS：當我係接待處聽緊 VA 解釋既時候，有一個寵物車上面有二隻兔兔既男人入黎要睇醫生，
個 VA 用比較惡既語氣同個男人講 " 你睇下佢地猛咁喘氣，佢地好熱啦。"
之後就去拎個冰墊俾二隻兔兔用。之後個男人話怕佢地冷親，
VA 就話 "佢未見過兔兔會冷親而死，但係就見過好多次兔兔因為中暑而死，今日先有一隻係咁。"
跟住個 VA 就開左間冷氣房俾兔兔涼。

16：45     用手餵 miffy 食菜菜，食左 3 大塊白菜 (只食綠色部份)、菜心 (成塊食哂)、半個蕃茄仔。
                  之後當我 "筆" 糧落碗既時候，休息緊既 miffy 突然間走過黎食糧。

17：00     除低左 miffy 既頭罩，等佢休息下。

19：00    訓醒左，咬左幾下籠，提我佢要要開餐lu，因為頭罩阻住佢用糧兜食瑩，所以用手餵。



6月9日 星期一 ( 手術後第一天 )

03：00    miffy all 左盲腸便，但係因為頭罩關係所以食唔到，仲搞到成個頭罩都係便便，
                 最後人手餵盲腸便。
                 終於第一次見識到 MIFFY 既盲腸便，都幾臭 (似BB仔ALL爛便便既味)，
                 係閃令令、軟身。用紙巾執起左俾佢，當中撈埋左粒普通便便，
                 佢只自己識得揀盲腸便，普通便便就唔會食。
                 不過我餵佢既時候無望住佢食，因為真係幾核突 ....

09：30    戴住頭罩照樣咬籠，放左佢出黎除左頭罩食糧。
                 食抗生素、止痛藥。
                 檢查傷口。
                 換尿墊、入草球 ( 草球一個已經食哂 )。
                 已經可以自己去廁所尿尿。
                 要求梳毛。

17:00     放左戴緊頭罩既 miffy 出黎休息下，趴下。



6月10日 星期二 ( 手術後第二天 )

09：00   食糧、檢查傷口 ( miffy 自己除左個頭罩 ... )
                可以自己企起身問你拎野食 (因為手術後第一日，佢後腳仲考夠力可以企咁耐)
                賴左一撻尿 ( 希望佢除左頭罩就會識去尿尿la )

19：45   miffy 又自己除左個頭罩，好彩傷口無俾佢舔爆。
                ( 識得自己除過一次就會自己除第二次  =.= 學習能力真快，好可惜好既唔學，壞既學到足)



6月11日 星期三 ( 手術後第三天 )

09：00    食糧、檢查傷口、食藥。
                 因為星期二晚訓前無戴頭罩，所以特別留意傷口。( 無辦法再戴，因為MIFFY學會除頭罩 )
                 MIFFY 已經正常可以去廁所尿尿。



----------------

感想：

整體黎講，手術好好，傷口係用膠水痴合，所以無線頭，兔兔唔會想咬，
戴頭罩係防止兔兔因為痕癢 / 自我清潔既時候舔爆傷口。
手術後一滴血水都無流過，接 MIFFY 既時候 EYE GEL 都已經清潔好哂。
戴頭罩因為繩係用活結，好多時候手術後既第一日，
兔兔會自我清潔而令到活結越黎越鬆，
所以要定時幫佢CHECK一下繩結。
手術後兔兔會尿係自己訓既地方�兔兔會慢慢去廁所附近，但係因為痛唔可以跳上去，
就會係旁邊尿尿，所以為免尿尿濕到傷口，可以係籠到舖毛巾�尿墊。
( 可以唔駛怕兔兔咬尿墊，因為手術後既兔兔無哂咬野既興趣 XD )
兔兔戴緊頭罩食唔到盲腸便，好多時候盲腸便係地下，
兔兔會努力咁去食，但又食唔到，就會俾佢踩到周圍都係，
搞到成身污糟。
( MIFFY 試過因為盲腸便食唔到，搞到頭罩下方全都係便便，手手腳腳都痴住盲腸便 )
戴頭罩唔識戴既話可以請教獸醫。

[ 本帖最後由 lingyan 於 2008-6-11 12:00 PM 編輯 ]

哦，咁姐係囡囡就最好去做，
仔仔就冇乜必要啦?!

絕育對於男女兔兔黎講都係好事黎既，
女仔兔兔主要係因為怕佢有子宮個d有問題先做，
而男仔兔兔如果無行為上既問題，例如霸地盤個d，就可以唔駛做囉。
個時記得betty係話，到兔仔仔生殖器官出問題既時候，都已經去左彩虹橋囉。

其實唔絕育有冇問題嫁??
Betty又話唔建議絕既?

可能出到街~見到唔識既人
小丸好乖都唔定呢~~~哈

好難講ga，
有時兔兔識揀人黎蝦，可能佢見到唔識既人先乖乖聽話呢 :057:

你加油丫，其實唔係想像中咁難照顧，
唔好學我自己嚇自己丫 :046:

係 q-pxt 買左 寵物尿片啦~~
我覺得聽日既姑娘有難..
小丸一驚就周圍搵地方避人~

station r咪有咯~~

尿墊邊度有得買啊??

miffy好叻仔
佢好快會好似以前咁跳跳紮紮

GOOD BOY:010:

恭喜晒
肯食野就多數無事
好快康復ga la ~

miffy乖乖豬~~~
祝早d好返.........做返隻開心活躍兔

祝 miffy 早日康復:002:

miffy好叻仔呀!:010: