兔兔基本用品篇

兔兔基本用品篇

養兔兔之前其實要準備好多野，特別係兔兔用品，
好多新手兔友們都會為左兔兔既用品而煩惱，街上面有五花八門既用品，
究竟邊隻最好用呢 ?

而家就介紹一下兔兔用品俾大家 la ^^


因為唔想用到商業圖片，所以用自家照片，如某些用品無照片，請多多見諒 >w<
介紹上既價錢只供參考，不會列出實質價錢，只有大約價錢 (+-$10)

如要轉載，請貼出此原文出處連結。

** 本篇文章純粹提供兔兔用品種類及介紹其用處、好處或缺點，**
** 至於在如何情況下使用到該物品，請各兔友自行考慮及決定。**



一、兔籠

兔籠大小，最好訓到一隻伸長手手腳腳既兔兔(其實應該係要訓到3隻兔兔既，
但邊有咁多人屋企會有咁大wor，所以最低限度要係一隻伸長手腳既兔兔大細)，
兔籠先考慮向橫發展，次要先向上發展。




單層X兔籠。



加建後的X兔籠。

最多兔友覺得又平又好用既係xb 標準籠/ xb 高級標準籠，二種籠有乜野分別呢?
二隻籠size都係一樣，只不過分別在於底盤，高級標準籠比較硬身。
而價錢上，都係200左右。呢隻籠係比較大(70 cm x 44.5 cm x 52 cm)。

第二隻好多兔友會買既就係x兔既兔籠，呢隻兔籠可以加建，
由原本既一層，加建成二層，呢種籠係比較大變化，
只需要係籠入面加層板，兔兔就可以擁有別墅ga la ^^

不過需要留意既係，層板點樣設計，有一定既難度，
因為要將層板調教到適合兔兔自己上落上下層，例如幫助兔兔跳上上一層既層板，
size要能夠俾一隻兔兔安全站穩。
(我家既”豪華團”曾經試過因為層板太細，而令到佢上落上層既時候成隻反肚跌落底盤>w<)

呢個籠如果係x兔買，底盤既墊板可以選擇網底/ 木板，
大家記得要選擇木板，因為網板對兔兔既腳仔唔好 ga。
籠既價錢大約係$240，加建一層既籠大約係$150，層板另計，價錢都係在於$20-$50之間。

如果打算將來俾兔兔24小時自由活動，亦都可以選擇用圍欄圍出一個地方當作係兔籠，都okga ^^。
(不過要買d比較高身既圍欄bor ^^)




[ 本帖最後由 lingyan 於 2010-1-15 03:51 PM 編輯 ]

二、廁所

兔兔廁所其實分幾種形狀，三角形(大約$50)、長方形(大約$60)、五邊形(大約$65)。
以廁所大細黎排序: 五邊形 > 長方形> 三角形



五邊形廁所同長方形廁所，適合任何體形兔兔;

上圖既廁所係x兔既廁所，確實價錢唔係咁記得($50左右 (thx兔友提供))，
上面列既價錢係以xb牌子。
不過x兔呢隻就無xb個隻實淨，x兔個隻如果裝重少少，拎起既時候會好似就倒就倒咁。
但係好處既就係廁所網可以去返x兔配返。
xb既就實淨少少，但廁所網無得配，只可以去x兔買一個，但未必fit位。




三角形廁所只適合體形比較細既兔兔(bunny 已經唔ｏ岩用)。

外間有好多種三角廁所，以xb、alex個種size最標準，
而仲有其他比呢兩種更細既廁所，已經唔o岩兔兔用。

仲有一隻係有蓋既廁所(印象中係粉紅色底盤、奶白色蓋既廁所)，
個種外間就指只適合侏儒兔用，
但大家試睇睇街上面4位數字價錢既兔兔，
仲係咪連侏儒兔適合用呢，就靠自己諗諗囉。


三、草球 / 草架



左邊 : X兔草球 (開合比較難，呢個已經係第二個係X兔買既，第一個已經一分為二...)
右邊 : XR 草球

草球– 貴既草球有Xr草球，一個大約$45，有三種放置方法，掛籠邊、吊籠頂、放地下。

平既草球，大約$25左右，size同Xr 差唔多，
但係無Xr咁靚，只不過係用一個爬山勾將草球同籠既鐵勾埋一齊。

注意一下既係，唔係每隻兔兔都識食草球，
有d因為太懶而且係petshop習慣左放地食，所以會唔肯食草
球入面既草草。(布甸正是唔識食草球既一位懶兔小姐–3-)

草架 – 有置籠內同置籠外，置籠外就方便主人入草，容量都比較大，
而置籠內既草架容量就比較細，未必足夠一隻兔兔一日既份量。


小提議: 其實唔需要一定要去寵物店買專放草草既草架/草球，
只要去十蚊店/ 家庭用品店，買有勾既掛籃都得ga。



呢個就係家庭用品店買既掛籃 la，一個$15，除左可以放得比草球多草之餘，
仲可以入滿草之後拍拍佢 "dun" 走d草碎，好方便 XD


四、食物碗




左圖 : xb食物碗 $30
右圖 : q兔鋼碗 $40

其實去10蚊店買個重身既碗都已經ok，例如煙灰缸之類。

我隻miffy已經將二個食物碗打爛哂 ，
最後決定買個鋼碗俾佢，睇下佢點再打爛 .\/.




[ 本帖最後由 lingyan 於 2008-11-8 08:05 PM 編輯 ]

五、水樽


普通走珠水樽 :

      呢一款係最普通既水樽 (300ML)，
      $20幾蚊有交易，出水位係珠，
      不過如果個水樽掛得唔好就好易漏水。

      兔兔飲水時間頂珠，會比較嘈。











xb 走珠上揭式水樽 :

       呢隻係XB水樽 ($80左右)，出水位係珠，入水位係樽頂，
       係利用水壓而令到水樽唔易漏水。

       樽頂既蓋上面有一個黑色既膠塞，
       打開樽蓋之前先將膠塞拉起，先會易將蓋拎 "抆"走，
       入完水之後，先蓋上樽蓋，再將黑色膠塞向下禁。

       不過缺點就係出水位太大，兔兔好易邊飲邊漏水，
       而且兔兔頂珠個陣比較嘈。







xr 水樽 :

       XR粉紅色水樽 (350 ML) $60左右，係最多兔友用既水樽，
       出水口係珠，樣就好似圖一介紹既普通水樽，但係佢比圖一既水樽好，
       因為兔兔頂珠飲水時候無乜聲，唔會嘈。

       呢隻水樽仲有另外一款，就係粉藍色既 (600ML) $100左右，
       但唔建議用呢一款，因為水樽出水位比較大，同圖二差唔多，
       所以兔兔飲水時候會邊飲邊漏水。





       布甸 : 媽咪剩係影野，都唔影下我，等我攝下位先得。




彈弓上揭式水樽 :




呢隻水樽出水位係用彈弓，唔係用珠，所以唔易漏水，
入水係樽頂，但樽頂蓋唔實，所以會易甩蓋。
( 起初我係買黎俾兔兔出街放兔袋用，但係因為蓋太易甩，所以放棄。)


水樽頭 :

呢個大約$40左右，只有水樽頭，無水樽，水樽需要用平時既膠樽裝飲品，
好處係水樽可以隨時換，唔駛怕洗唔乾淨，但係水樽出水位比較大，
兔兔邊飲邊漏既機會比較大。


XATER BUDDY 水樽 :

水樽身係玻璃，唔會俾兔兔咬爛，但比較貴，8 OZ 已經要 $110。



[ 本帖最後由 lingyan 於 2008-11-8 07:56 PM 編輯 ]

六、墊料

墊料有好多種，紙砂、木粒、豆腐砂、草粒、尿片 等等 ..


紙砂 :

紙砂，吸水力強，吸味一般。
濕水後紙粒仍然係一粒粒，唔會散開。

通常都係二種牌子 : Breeder Celect Cat Litter 同 小動物環保再造紙砂。

小動物環保紙砂，唔係太安全，因為佢初期分類做得唔好，
好多時候紙粒入面會有鋁片、膠粒等等什質。
紙粒捲得唔實，有d紙粒好長，有d好短，而且睇佢外表好粗糙，
外觀唔好。

       Breeder Celect Cat Litter，捲得比較實，
       每粒紙砂都差唔多長短大細，
       外觀上唔錯，加上佢做初期分類都好似幾好，
       我自己用咁耐都無發現有雜質。

       二隻紙砂吸水力差唔多，價錢亦都係一樣 (15 L $85)
       咁大家會選擇邊隻呢 ?













豆腐砂 :

      豆腐砂吸水力強，吸味ok，但價錢比較貴，
     左圖既豆腐砂，已經要$90左右。

     濕水後豆腐砂會慢慢軟化，遇到大量液體會變成水。
     方便沖入廁所唔會塞。

     因為豆腐砂我只買過一次，所以唔知道牌子既質素囉。














尿片 :

     尿片唔適合所有兔兔用，因為如果用黎舖籠底，有d兔兔係會咬開，
     好似想殺左張尿片咁，所以要用之前，去十蚊店買d細包裝既尿片試下，
     費時買左一大包返屋企試完之後無用丫嘛。

     另外有d兔友會將尿片cut開一半墊落廁所底，在放紙粒之類既墊料，
     方便倒廁所之餘又可以增加吸水力，唔錯唔錯 !

      30X45 (1.5尺) 平d，80蚊左右有100塊，
     而呢隻60x45 (二尺)都係80蚊左右，但只得50塊。

     1.5尺通常舖到半個籠左右，2尺就大約一個籠。

     俾兔兔用既最好選擇無味。







木粒 :

通常木粒大部份兔友都係用woody cat (8 liter $50左右)，
呢隻好似係松木粒。
會有少少松木味，但尚可接受。
木粒遇水會變成粉，變成粉之後，有d兔兔會對呢d粉敏感，
所以用既時候要留意一下兔兔會唔會對粉敏感，
如果敏感既話就要停用囉。

另外一種木粒就係 Feline Fresh (7 lbs $40左右)，
我自己未用過，但係聽好多兔友講吸水力唔錯，
但問題就係味道比較大，唔係人兔都受得到。


絕對唔可以用既墊料 :

1. 木槺 : 木槺會影響兔兔既呼吸系統，易惹塵埃，
    有時兔兔抓木槺可能會搞到木槺插到眼睛。
2. 貓砂 : 貓砂(水晶貓砂之類)其實唔適合兔兔用，因為係化學物質，
    有時候兔兔會百厭扯走廁所網，兔兔唔知道就可能會食左落肚，
    會有危險。加上貓砂既味比較大(什麼檸檬味、青蘋果味)，都會影響兔兔呼吸。


[ 本帖最後由 lingyan 於 2008-11-8 07:46 PM 編輯 ]

7. 其他 (唔急於一時添置，可以迎接左兔兔之後先再買)

     

     針筒 :

    其實呢d都算係基本用品，但係唔係急於添置既，
    可以之後先再買。
    呢一枝係大既針筒，係藥房買既，
    本身會有枝針，但係枝針已經俾我拎走左，
    得返個筒身，
    呢個就係平時強迫餵水或者食草粉用既針筒 la。
    藥房買$1一枝。

    (記得小心針頭丫 ~~~~~)



     藥物 :

      infacol 其實係俾bb用既驅風藥物，
      內服用既，
      因為 infacol 係 sugar free，
      所以都適合兔兔服用。
     (記得兔兔用既一定要係 sugar free)

     係幫助兔兔排出腸胃內既氣體，
     加埋按摩肚仔就相得益彰 la ^^

     兔兔大約食 0.2-0.3ml，侏儒兔減dd。
     大約係$50蚊。


     草粉 :

      平時如果兔兔突然間唔肯食野，可以開d草粉俾佢食，
      作用強逼性食野，
      因為兔兔唔可以唔食野 ga ma。
      或者兔兔便便唔多正常，可以俾佢食d清清腸胃。
      ( 我自己平時一見到兔兔便便唔靚，就會俾佢食一餐，
      等到便便靚左就唔俾 )

      呢包係獸醫到買既，大約 $100左右。
      草粉有期限 ga，日期就係包裝袋上面，
      聽講草粉有香蕉味同原味 ga。

      草粉左上角如果有logo就係香蕉蘋果味，
      如果無既就係原味。
      (鳴謝兔友報料 ^^)




草粉究竟點開既呢 ?

以下係我自己既方法 :

1. 用暖水注入容器 (我自己就係用倉鼠用既食物碗，落少少熱水，再落凍水)
2. 逐少落草粉，落完就搞混佢，直到似糊仔，有少少"傑"身。
3. 將草粉放係到大約30秒。
   (因為我覺得o岩o岩開完既草粉，d水就好快被粉吸乾就變到好"傑"，所以等30秒俾d粉吸水，
    再落返少少凍水變返稀d，咁d草粉就唔會咁快越餵越傑)
4. 抽草粉可能會比較難，獸醫係教我邊搞邊抽，將針筒口差唔多貼到容器既底部，
    邊搞邊抽。
   (另外差唔多餵完既草粉好多時都好難抽到針筒，
    我自己就會將針筒篤到容器既底部，跟住用力抽起針筒棒，再將針筒拎離開容器底部少少，
    草粉就會吸入針筒入面囉。)
    草粉其實好多兔兔都會自己食，如果肯自己食既可以用外賣匙慢慢餵佢食。


藥物及草粉方面，只提供參考及適用於有經驗之兔友，
新手兔友請儘快帶兔兔睇醫生。



     木瓜丸 :

      呢個係比較健康既零食，
      一星期可以俾3-5粒當係獎勵兔兔。
      可以幫助兔兔all返d食左落肚既毛毛出黎。
      (我二隻兔食完一粒之後，
      all出黎既便便都會一串串，
      可能真係有用呱 QQ)

      有200粒裝 ($80大右) 同500粒裝 ($120)。

      係寵物店買既時候記得要睇清楚食用日期，
      有無良奸商放d就快過期既出黎賣。
      剩返3、4個月既就唔好買 la，兔兔幾個月食唔哂200粒咁多 ga。


      梳 :


     左一 : 針梳
     左二 : 有膠粒頭針梳
     右一 : 虱梳
     右二 : 按摩梳






針梳 ($30左右) - 呢種係無包頭既，係長毛兔用，不過用既時候要輕力，
因為兔兔皮膚好敏感，太大力用針梳會整痛佢地，令到佢地一直想走，
所以最好買另一種。

有膠粒頭針梳 ($90左右) - 有膠粒頭既針梳，係比針梳比較好，因為有膠粒包住，梳兔兔唔會痛，
兔兔會覺得舒服d。買呢種膠粒梳既時候，有d係可以伸隻手摸下d膠粒，
有d膠粒梳d膠粒唔靚，睇落去粒粒都唔係圓既，呢d就要自己考慮下買唔買囉。

基本上，短毛兔都唔需要用到針梳。

按摩梳 ($50左右) - 適合短毛兔用，而長毛兔都可以用，因為按摩梳都可以幫長毛兔梳已經掉落既毛。
我有一次見獸醫既時候，佢地都叫我買個膠按魔梳用會比針梳好，因為針梳好易整痛兔兔。

虱梳 ($30左右) - 平時可以用黎梳下兔兔，但如果不幸地兔兔惹到虱，見完醫生滴左滅虱藥之後，
可以用呢把虱幫兔兔將死左既虱梳走。

       剪甲鉗 :

         指甲鉗最好買d實淨少少既，
         因為兔兔指甲比較厚，
         怕指甲鉗剪到斷。
         買d $30左右就已經 ok。

         (如果唔識剪既話可以帶去兔協到學 ga ^^)









     剪毛交剪 :


     呢把較剪係某間petshop買既，大約 $20，
     係幫兔兔剪毛用既，一定要買圓頭較剪。

     最好就二個人幫手，唔識既話可以帶去兔協剪毛。









      vetbed :

     呢個係冬天既用品 / 兔兔有腳瘡，
     放係籠底俾兔兔保暖用既，大約 $100。

     毛毛係唔吸水，如果兔兔係上面尿尿，尿尿係會流到底部，
     可以清洗。所以我會覺得係vetbed底部可以加塊尿片，
     以防兔兔尿錯可以吸尿。





消暑用品 :



左圖 : 雲石
右圖 : 鋁板

雲石大約 $110，
呢個唔易俾兔兔推走，如果百厭既兔兔幾好用，而且方便清洗。

鋁板大約 $80，可以摺疊，百厭既兔兔可能會將佢摺起。
(miffy就成日幫我摺起佢，唔鐘意用)
清洗唔多方面，因為太多位置會攝便便同草草 ~

其實消暑物品仲有冰種、冰水樽 (加鹽)。
呢 d 可以放係籠外，盡量溫度降底。

亦有兔友做寒冰床俾兔兔，都唔錯 ga ^^

     除塵轆 :


     呢個唔係必需用品，只係一個幾方便既用品。
     好多時候幫兔兔梳完毛/剪完毛之後，搞到周身毛，
     用膠紙痴極都仲有，
     痴哂係件衫到，好似我呢種鐘意著黑色衫，但係有隻白色兔，
     就成日搞到件黑色衫有好多白色毛，好核突。
     有左呢個就方便好多 la。
     呢個都唔卻，20蚊，優惠裝有一大一細。
     某d寵物店都有類似呢d賣ga。







[ 本帖最後由 lingyan 於 2010-1-15 03:45 PM 編輯 ]

好多時候，俾一d無良既寵物店知道新手兔友第一次養兔，
就會好似"執藥"咁執一堆野俾新手，
問佢每件物品有乜用，佢都可以作一d解釋出黎，
但係咪真係有用呢 ?

唔需要買既物品 :

1.止all水 : sales 會話 "兔兔去到新既環境會唔適應all軟，就要俾佢飲"，
但係實際上唔係咁樣，兔兔去新環境唔習慣all軟便呢個的確係真，
但係兔兔會自動適應，跟本唔需要買止all水，如果幾日都係all軟便，
就需要睇獸醫，唔好自己買藥俾兔兔食。(左買右買藥物既錢，都夠睇獸醫囉。)

2. 沖涼粉 : 兔兔唔需要沖涼ga，乾粉同液都唔需要，因為兔兔會自己洗白白，如果沖涼物品殘留係兔兔身上，兔兔食左就唔好la。如果兔兔臭，就係主人既負責，唔關兔兔事丫。

個次我去兔協買vetbed ,,佢叫我唔好買喎~,,佢話冇買用,,我想買,,但係我呀媽又話唔洗-.-

剪甲鉗  吉之島十蚊就有
不過鉗得唔徹底,  要再修先得

長方形廁所,,Q-rabbit$50jar~

草粉
香蕉蘋果味 ~> 左上角有香蕉同蘋果既公仔

原味 ~> 左上角完全綠色, 無公仔

我想問下...
木瓜丸要幾錢??

原帖由 nga_yi 於 2008-11-8 05:14 PM 發表
我想問下...
木瓜丸要幾錢??

R 記 200粒 - HKD81.00   500粒 - HKD112.00

多謝你丫

好詳細 . 我諗有好多我好似甘

唔係幾識 . 比你點1點 . 即明  :048:

哇!花多眼亂:056:

想確定一下木瓜丸係唔係唔再出??