各位幫幫手, 兔兔成日係同一個尿尿

佢都會係廁所去, 不過佢好鐘意係個廁所後面個位去,
咁岩果個位啲尿尿落唔到去下面個盤, 搞到成日有灘尿係到,
我試過每次見到就用紙巾抹完用白醋再擦擦, 但係佢又係果到去多次
頭都痛
有無人用li款籠可以教教我??

用尼個廁所......
阻左果籠好多位喎.......
你試下把個廁所放係你圈住果個位度......
睇下得唔得.......

我隻miffy一開始都出現呢個情況唔識去兔廁
我都諗如果尿尿跌到落底起碼都唔駛一日清十幾次呀
所以個時我都不知幾頭痛
甘岩有日係吉之島$10店見到有正方形既木兜($10)
心諗唯有搏一搏啦
反正d木可以俾miffy咬下
返到去放哂miffy既排泄物上去再+小量木粒
果然即刻湊效
之後+多d木粒就唔會整污糟miffy對手腳
而家每日miffy都識係上面方便
而我就每日清1-2次
每次倒走d屎粒去原本個兔廁(我無拎走照放係原位)
一來貪方便
二來搏miffy有日會識去真正既兔廁
等木粒濕到甘上下就成個倒落垃圾桶再放新既木粒入去
呢個方法係就係只有治到本但不治標
但至少唔駛一天到夜拎起成個籠架再彎腰幫佢抹呀嘛:043:

[ 本帖最後由 logon 於 2008-11-19 09:17 PM 編輯 ]

原帖由 尤尤 於 2008-11-19 09:05 PM 發表
用尼個廁所......
阻左果籠好多位喎.......
你試下把個廁所放係你圈住果個位度......
睇下得唔得.......

我個時每個位都放過哂
miffy就硬係要搵d難抹既地方去
吹佢唔漲:059:

試下只用紙巾印走d 尿, 唔駛洗唔駛抹住, 睇多二日佢仲係咪係o個度痾丫

試下移移個廁所去果度

買木制用品時, 避免買加工過的
表面的塗料對兔兔可能有害

我有諗過, 最慘係個廁所後面有位俾佢捐入佢, 所以佢成日係個廁所後既L字位去, 我想揾啲野阻上佢捐入去, 但係又唔知用咩好...

原以為li個籠清潔會方便啲,點知宜家好麻煩....唯有試試唔同方法, 睇下有無用呢...

其實呢款廁所唔太適合放係籠內
因為實在太阻位, 浪費不少空間
我屋企都有個, 放係露台角落

我都覺, 買左番黎先覺咁大...或者我放佢出黎果陣先用..
咁有邊款toilet好介紹??  
我見出面好多都係鑯網底, 賓仔成日係上面, 腳仔會好受力

其實你隻兔兔都唔係好大~
用ab/ alex既三角形廁所ok架~
同埋唔會太阻個籠~加上因為你依家呢個五角形廁所,
佢有塊膠係上面,你放唔到草架係廁所上方,咁樣兔兔會難d識去廁所~
因為佢地鍾意邊食邊痾架~如果想教識佢,最好比佢可以坐係廁所度又食到野~

如果你唔想要網底...咁就真係得呢隻五角形~so far我淨係見過呢隻唔係網底~
但係其實如果賓仔識得去廁所之後,同埋佢熟左個環境~
佢就唔會成日坐係廁所度架喇~佢會周圍攤~
你再多d放佢出黎~佢就可以係d平既地方休息~所以唔駛太擔心~

其實我屋企total以前都好似賓仔咁...
我放個廁所去邊,佢就走去第二邊痾,之後我又放去佢痾果邊,佢又走返去之前廁所個位度尿尿~
但後來放左個草架係廁所上面等佢食草之後,佢就好快學識去廁所喇~
與此同時,你一見到佢尿係其他地方,要搵醋清潔下佢wor~

[ 本帖最後由 光之天使 於 2008-11-19 11:21 PM 編輯 ]

你個隻係bunny，唔好買三角形，大左就會唔夠位，
要買長方形廁所。

我都建議你換個廁所, 如lingyan所講賓尼好大隻架
依家買長方形岩架, 而且個廁所會比較貼籠邊
無位比巨捐入去
呢款籠較易lon尿尿係邊位, 唔識去廁所就洗餐死......

兔兔細個先至會成日企廁所
大左就唔會架啦

細個佢體重仲好輕, 受力唔係太大
唔駛太擔心呢個問題

我睇過大家之前既post, 我都有放草係個廁所上面, 等佢多啲時間係上面又食又痾
不過佢好鐘意捐去入面, 可能覺得好好玩掛...

今日出去睇下廁所先, 買個可以貼邊, 起碼佢捐唔到出黎...!!

試下放個草兜在你圈住果個位,
十元店、家品店會有好多膠兜,好多size,
搵個可以攝入去仲可頂實果廁所的,
咁兔兔就算在膠兜前面尿尿,亦唔會漏落條邊到,
而兔兔又可以坐係廁所度食草.
兔兔仲細個,鍾意藏埋自已覺得安全d,
所以攝入廁所後面,試下鑽個洞扣住果廁所,
兔兔通常都鍾意籠內的物件固定架.
用布遮一邊籠暗暗地會增加安全感的.