兔兔名字: 雷布甸
兔兔性別: 女
兔兔生日: 29-11-2007 (醫生提供)
兔兔品種: 貓貓兔(有啲人話似安哥拉兔)
兔兔介紹: 為食兔一名, 絶技係扮傻, 扮可憐, 最鍾意上兔婆張床跳舞
布甸喺係金魚街o既龍x樂園買o既, 當時大慨2個半至3個月, 佢喺放喺下層o既, 所以並唔係咁起眼. 正當我同兔爸打算走嗰陣, 我就突然發現佢, 於是就叫嗰售貨員攞俾我睇. 當我抱住布甸嗰陣, 佢好乖, 但當佢一過兔爸到, 就即係向上爬, 爬上兔爸膞頭到. 商量咗一陣之後, 我哋決定帶佢返屋企. 咁快決定買o既原因, 係因為我哋之前都睇中過一隻兔兔, 但嗰陣我哋未搵資料, 唔敢貿貿然然買, 點知第二日再去, 隻兔兔已經唔見咗....... 所以今次遇到布甸, 我同兔爸都唔想再失去. 於是, 就係咁樣布甸就成為咗我哋o既乖囡嘞!
布甸以前係住喺兔爸屋企, 兔爸屋企有2隻狗, 起初我都好擔心2隻狗會咬布甸, 但兔爸堅持話唔會, 仲話細嗰隻應該會鍾意布甸添! 返到去第一日, 布甸真係一啲都唔驚, 已經好八掛咁周圍嗅, 而2隻狗呢, 大嗰隻就對布甸無乜興趣咁, 細嗰隻就好好奇但又好驚, 仲驚到腳陣添~ 過咗無幾耐布甸已經完全唔驚嗰2隻狗, 細嗰隻狗仲當布甸係佢自己個囡咁, 幫布甸舔面同pat pat添! 但係兔爸o既爸爸就成日俾問題我, 佢話兔仔要成日食嘢, 跟住就日日都俾舊紅蘿蔔布甸, 好彩布甸嗰陣唔食咋, 如果唔係真係不堪設想.....
1個月之後, 不幸o既事發生, 兔爸o既媽媽唔鍾意兔兔, 要兔爸將布甸俾咗人, 仲因為布甸而嘈得好犀利. 嗰陣我都唔知點好, 好彩有個朋友應承幫我照顧布甸, 好唔捨得下都要將佢帶去我朋友屋企. 當我離開我朋友屋企之後, 我終於忍唔住喊咗出嚟......... 布甸件事我話咗俾屋企人知, 嗰幾日我一啲笑容都無, 無晒心機, 想喊咁, 兔婆初初只係話, 帶佢返嚟養住先, 搵到人要就俾人. 但我堅持話, 如果帶佢返嚟, 就唔係養住先, 係要養佢一生一世架! 兔婆: 養到幾耐, 我: 有成5-10年架, 兔婆: 10年我都死鬼咗喇! >< 求咗幾日之後, 兔婆終於都答覆俾我帶布甸返嚟~ ^^
就係咁, 布甸就住咗喺我屋企嘞~ 初初布甸成日咬嘢, 咬爛咗梳化, 按摩椅條電線, 其他電線, 鞋.........總之就好多嘢啦! 兔婆就成日鬧, 跟住又話唔要佢, 掉咗佢出街....... 直到依家, 每次布甸咬爛嘢俾兔婆發現嗰陣, 兔婆都係咁講...... 不過, 好彩都係得個講字啫~
好景不常, 上年又發生一啲事, 令到布甸o既居留權再次成為問題~
由於我家姐有咗bb, 而佢想將bb放喺我屋企, 等兔婆同工人照顧. 但係佢話唔可以有動物喺度喎! 有日, 兔婆: 可唔可以唔要布甸, 我: 更係唔得! 有布甸有我, 無布甸無我. 我當然極力爭取啦! 我話將布甸放入我房, 長期關門, 房門隙貼啲防塵條. 答案當然唔得啦!. 為咗哩個問題, 我都同兔婆嘈過. 爭吵咗幾個月, 一定要有一個答案. 最後, 經過其他家姐幫忙, 終於成功為布甸爭取到居留權~
第一次養兔兔乜都唔識o既我, 由布甸第一次病到絶育嗰陣, 我真係唔知點好, 又唔知帶去邊度睇醫生. 嗰陣只係知道大圍嗰度有得睇, 於是絶育都係喺大圍度做, 好貴呀! 後來, 上網搵到mini house哩度, 喺度學咗好多嘢, 先知道原來仲有其他診所可以睇兔兔.
唔經唔覺, 布甸都已經嚟咗我屋企差唔多2年, 今年佢就3歲喇! 雖然布甸只係差唔多3歲, 但係佢經歷o既事真係唔少呢!
[ 本帖最後由 hamster1013 於 2010-6-5 11:22 PM 編輯 ] |
|