一直給兔友都係推薦APD同Oxbow乾草, 而有好多新手或有少量的資深兔友都可能對Jojo's草呢個品牌唔認識或者只係聽過而冇去選擇給兔兔食用, 雖然我呢個POST並唔係對Jojo's草有詳盡嘅講解, 但我就以我家Cookie分別食用呢兩隻草嘅屎屎作出比較, 可以俾大家有多一個品牌選擇。
當然我準備推薦大家去俾兔兔食Jojo's草係因為覺得佢好啦~ 而我又係點認識呢隻草呢?? 點解會突然俾我家兔兔食呢?? 以下係我家Cookie小小嘅故事分享~!!
Cookie的飲食:
Cookie細個嗰陣係食Kaytee草, 因為呢邊並唔多選擇, 我認識嘅草就只有呢隻, 後嚟好展轉咁喺網上搵倒訂Oxbow草, 我就立即同佢轉食Oxbow, 佢好鐘意.. 每日派草時間都會發癲咖~!!
其妙的一次:
今年一月, 我家Cookie突然對草提不起興趣, 食得好少, 屎屎變細了, 所以, 兔爸帶咗佢去睇醫生, 但醫生話佢一切正常好健康, 只係大牙生歪咗要磨牙, 可能因為咁影響到佢嘅食慾, 但經醫生幫Cookie磨牙一星期後, 情況並冇好轉, 而糧就正常咁食, 我同兔爸就以為係該批Oxbow草出咗問題, 就拎返去換, 換咗第二箱返嚟都係一樣係食少少就停, 兔爸就唯有買返Kaytee俾佢試, 結果亦係一樣~ 我由香港寄咗包Momi 1st, 要兔爸親手餵先食咗幾條, 我哋都唔知點算!! 兔爸好努力咁喺網上搵倒另一個地方有Oxbow草買, 佢即刻揸車去, 嗰度個Sale好好, 兔爸同佢傾Cookie嘅情況, 佢都覺得好奇怪, 或許係鬧情緒.. 真不得而知, Sale就介紹兔爸除咗買Oxbow, 不如買包Jojo's俾Cookie試下, 嗰陣兔爸都未聽過Jojo's呢個牌子, 最攪笑係呢邊啲大型嘅寵物店都冇呢個牌子嘅草買, 所以真係未見過, 但兔爸心裡只係覺得乜都一試, 就買咗一包細嘅返去~~~
不過, Cookie依然都係俾面就食少少咁啦~ 四個品牌五包草放晒喺度, 每日都令爸好頭痛... 直到二月尾, 我過返嚟加拿大嗰晚, Cookie唔單止冇唔記得我, 而且仲出奇地冇事, 我俾乜草佢都食~ 哈哈~~ 可能係因為佢掛住我~~~~~!!!!
就因為呢一次奇妙事件, 我認識了Jojo's草~
呢隻草好香, 當然不及APD, 但唔會差過Oxbow, 而且草碎極少, 去到好底先有, 同埋唔會碎到好似草粉咁, 不過, 因為對呢隻草嘅認識少, 所以, 都唔敢幫Cookie轉做主草, 只係副草, 當Oxbow冇貨/草質差嗰陣就會俾Cookie食Jojo's, 有時都會兩溝嚟食, 但當Cookie食Jojo's嗰日, 我發現佢個廁所都係金黃一片, 而且啲屎屎仲大粒啲, 開初都唔肯定關唔關Jojo's草事, 直到有期Oxbow嘅草質差到不得了, 無論我哋換幾多箱都一樣見啡多過見綠, 喺要等下一次船期前, 唯有轉食Jojo's, 果然嗰段日子嘅屎屎真係又金又靚又大, 到轉返Oxbow, 又變返冇咁金同細返啲, 可以肯定, Oxbow唔算差但比Jojo's "迅"色。
對Oxbow草的重大發現:
我唔知呢件事有冇人知, 不過, 我就真係未聽過, 有次我哋同訂草商個Sale傾開計先知, 原來Jojo's係Oxbow嘅批發箱, 即係所有Oxbow嘅草都係由Jojo's嘅草場批出, 所以, 基本上Jojo's同Oxbow嘅草其實係出自同一個地方, 同一個草場, 我聽到那時真係好訝異, 咁即係Jojo's先係Oxbow嘅主草商, Oxbow只係純粹自己一個品牌, 但只聽一個人講未必係真, 過咗一段時間, 我哋又再同另一個同訂草商Sale傾, 佢講嘅同之前個Sale講嘅都係一樣, 咁即係真嘅~ 此刻, 我明白點解Oxbow草唔算差但會比Jojo's "迅"色, 因為, 既然Jojo's先係主草商, 而佢係有自己嘅出草嘅品牌, 理論上靚啲嘅草都會留返俾自己嘅品牌出售, 而次一級就會批出去俾其他品牌嘅草商, 雖然, 就呢一點我好難有實制嘅証明, 但我就分別俾Jojo's同Oxbow嘅草Cookie食, 用佢啲屎屎作比較, 大家可以睇睇呢幅圖:
好明顯Jojo's草出嚟嘅屎屎係比Oxbow草出嚟嘅屎屎係大粒啲同金啲~
![]()
新增 == 剛剛影嘅Jojo's屎屎
![]()
新增 == Jojo's草相片
![]()
![]()
新增 == Jojo's草嘅袋底相片
袋底嘅草依然清晰可見, 甚少草碎。
![]()
PS:其實呢個POST並唔係講Oxbow嘅草唔好唔靚, 希望唔會引起Oxbow's fans嘅誤會, 我只係想俾大家有多一個選擇同對多一個品牌草有所認識, 如果有任何人對我以上嘅分析有任何意見, 歡迎溫馨提出, 謝謝!!
[ 本帖最後由 波子 於 2010-6-16 12:10 AM 編輯 ] |
分享
收藏
支持
反對
