請教關於籠/圍欄既擺放位置

大家好, 好耐冇見啦!
我同rabbit仔仲有3個禮拜就會返香港, 但係我仲未諗掂返到香港屋企之後, 應該將佢個籠擺邊,
我諗住幾個選擇, 請大家俾D意見

1. 擺響廳
廳有個空位(完全冇傢俱), 大概100尺,
打算訂造大概8x12尺既圍欄當係佢既住所(暫時唔知邊度可以訂造), 我響屋企時會再放佢出黎玩

好處: 活動空間大
壞處: 屋企係開放式廚房, 煮飯時可能會有油煙同大陣味; 有客人時唔知會唔會過嘈

2. 擺入我房
如果佢住我房就只可以用籠

好處: 清靜
壞處: 活動空間細好多, 雖然我響屋企就一定會放佢出黎玩, 但就次次要抱佢落廳(我屋企係3層既), 有時真係唔知佢想唔想落去架嘛; 佢好鐘意咬籠, 夜晚我會訓唔到

3. 集合1同2 - 日間住我房, 夜晚住廳既圍欄 (呢個option我自己覺得最好, 但有個大問題)

好處: 日間佢多數都係訓覺, 響我房訓會舒服D, 夜晚想玩都有成100尺空間俾佢跑
問題: 唔知佢會唔會適應到有2頭住家, 識去哂2邊廁所。佢而家係識去廁所架, 我驚咁樣會搞到佢無所適從, 又變返唔識去廁所

4. 放天台
好似(1)咁放圍欄, 另加一個籠俾佢遮太陽擋雨

好處: 活動空間大, 而且清靜
壞處: 驚多蚊蟲, 而且感覺好似同佢距離好遠, 我自己最唔鐘意呢個option

麻煩大家俾下意見丫!! 唔該哂!
我想盡快訂好所需物品, 等佢一返到我屋企就有個安樂窩!

仲有一樣好重要既point唔記得提, 就係我打算返香港後會領養多一隻兔兔, 可能要加埋呢點作考慮因素

咁你地會唔會再走架~帶rabbit仔返黎既手續會唔會好複雜~只係八卦想知

你既問題我再幫你諗諗先
P.S. Rabbit仔好幸福丫 有咁大個空間俾佢玩 係香港好難得架啦

我地唔會再走架啦!
其實我都想交代下, 唔好令大家覺得我帶住隻兔周圍走好唔成熟

其實當初養rabbit仔時, 我同兔爸係打算響英國長住架
但係上年年尾, 湊大我既我公公突然過身, 明明佢身體一向好健康, 呢件事對我打擊好大, 令我開始珍惜同屋企人相處既時間, 我爸爸亦開到口話自己年紀大想我多D陪佢, 我聽到時真係好心痛, 所以我先決定要返香港, 而兔爸亦為左我決定返香港

帶rabbit仔返黎既手續都幾複雜架, 好多文件要處理, 好彩呢度有位兔友俾左好多資料我=)

可能選擇1會較好.
兔兔雖然好靜,但需要同人互動的,
放在房或天台其實好容易忽略左佢地.
但油煙味,太嘈確是有影響,曾聽過有兔兔怕
炒肉的味道.所以是否可將欄再移開廚房些.
另外可以在欄內放個籠或一個隱蔽的空間
讓兔兔睡覺或覺得驚時有得避下.

日間住房, 夜晚住廳既圍欄,兔兔不易適應,
會減弱安全感.

放在天台可能是最差的,
香港天氣夏天可以好熱,放係天台會中暑架.
另外香港有麻鷹會對兔兔造成危害的.

p.s. 香港買到的圍欄是2呎x2.5呎一塊, 6塊 1 pack 買的.

1啦,我同意上面兔友講法,真係唔好比兔兔聞到炒肉味同比兔兔望住妳食嘢,因為
兔兔真係會好驚同短時間內唔信任妳,呢個真係要注意一下.

另外我好尊敬妳們對兔兔的呵護及尊重,由外地回來香港亦先緊張兔兔的未來居所,兔兔
們就是需要多一些像妳們一樣這麼有責任心的主人.

說到做到,尊敬妳!

其實我好想知多d有關兔兔移民既野~
有機會真係希望你可以開個post講解一下~(雖然未必人人會有用,但識多樣野都好)

講返你個問題先~

其實我都覺得1會係最好,
1.地方大d~呢個係最緊要既
而且我相信你留係廳既時間都會長d,長過係房
至於你話開放式廚房既問題...
其實如果你屋企本身已經係開放式,我諗抽油煙既設備應該已經唔錯,
又或者盡可能將rabbit仔個籠set係最遠既地方
當有客人既時候,或者帶佢返房~

其實最重要係睇返你個廳既setting,
e.g. 放rabbit仔既時候會唔會有d位佢入左去你捉唔返佢~
e.g. 有無d咩係唔咬得

2. 如果張rabbit仔養係房,
萬一佢想自由活動,咁佢就有機會行樓梯,我覺得始終有少少危險

不過如果你話第3個方法,兩頭住家,
其實都ok既,but開頭真係要比多d時間and耐性
你既憂慮亦都係好有道理,
rabbit仔真係可能唔識去晒兩邊廁所都唔定架,
而且開頭可能真係會驚,唔適應~
但係我覺得時間耐左,佢就會習慣,畢竟去極都係兩個地方je
而且你日間唔係屋企...萬一屋企嘈,rabbit仔都會驚~

天台就一定唔會考慮架喇...

我會選擇1, 我都係放係廳近廚房門口, 廚房油煙不用怕, 煮食時的嘈音, 兔兔會慢慢適應,
而油煙向上升, 應該唔係好影響兔仔。

有客人時會嘈, 兔仔會識走返入籠自己的安全地方, 你有需要時可以收起圍欄, 將兔兔連籠放入房。

我的籠/欄setting可以見: http://mini-house.info/thread-8744-1-1.html , 希望可以幫到你 (籠係alex today籠, 欄係q-x廊買的, 尺寸恰恰好)

多謝哂咁多位既意見!
我估我會選擇(1)啦=)
其實我屋企比較古怪, 廳大部份時間都冇人既, 我地全屋人都鐘意各自匿響房
不過我會為左rabbit仔多D留響廳

然後會買定多一個籠擺響我房, 等rabbit仔適應新環境後,
如果有客人/嘈就可以帶佢上我房
其實我間房都有200尺空間俾佢活動既, 不過只限我響度時先可以放佢出籠

同埋total媽提起我先記得, 其實我屋企廚房係有度屏風可以關埋架!
咁就解決左油煙問題!
不過我仲要買度閘門封住廚房既出入口...大家有冇提議可以響邊度買呀?
total媽當我順利完成成個移民後, 再post返篇文講兔兔移民呀=)

天才文仔,
多謝你=) 作為兔兔既主人, 幫佢打點起居係我份內事黎既!

wm20472,
我睇左你個post啦, 幫到我好多呀!!多謝!!同埋我覺得你用膠塞好聰明呀!
但係我有小小疑問, 如果我買2 set圍欄係咪可以砌到一個大D既方形架? 因為唔係好知圍欄個構造