大家好, 我同rabbit仔平安返到香港啦!
之前有兔友都好有興趣知道兔兔移民既手續, 而家可以同大家分享下啦
我同rabbit仔係由英國去香港既, 以下既分享只係根據我地由英國去香港既經歷, 由其他地方返HK既手續我唔清楚係咪一樣架
事前準備 - 手續篇
1.) 香港漁護處入境許可證
呢份證有效期係六個月, 我會建議一決定帶兔兔返香港就要申請入境證明, 因為要有呢份證明先可以同兔兔訂機位, 亦即是如果你打算同兔兔訂同一班機既話, 代表你都要等呢份證明先訂到自己既機位
申請方法係, 響漁護處既網站print入境許可證申請表, 填好後連同HKD344既支票寄返HK漁護處, 佢地收到後會響5個工作天後寄返張許可證。因為郵寄需時, 由我地遞表後, 過左大半個月先收到許可證
2.) 英國DEFRA - Export Health Certificate (健康證明)
你可以打去DEFRA(英國版漁護處)既Animal Health Office同佢講你要運兔兔返香港, 佢就會send份form去你email, print出黎填好後就可以寄返俾佢地, 佢地都好好交帶架, 一收到就email通知我話佢地收到。你會要響張form寫低你準備帶兔兔去邊間獸醫診所出健康證明, 我同Animal Health Office確認左rabbit仔平時去開果間診所係官方認可既診所之後, 就響張form填左個間診所既名。
呢張證明需要響兔兔離境前14日內先可以俾獸醫簽既, 而Animal Health Office會直接寄張form去你既指定獸醫診所, 但佢會好遲先寄, 大概我走之前5日佢先寄到去獸醫度, 而佢寄左後都會send email通知我既。我於是就book左走之前2日去獸醫度同rabbit仔檢查, 去到其實獸醫只係摸一摸佢, 同佢磅下重, 就簽左張證明俾我喇
3.) 兔兔機位
現時英國返香港航班, 只有British Airways肯運兔仔(CX, Virgin只肯運貓狗), 而你係唔可以直接向BA訂兔兔機位, 必須透過agent同BA book。Agent會幫你做既係訂機位, 同埋幫你訂個符合官方規格既手提兔籠上機用
返港當日
-英國離境
上機當日, 我地要響兔兔班機飛之前起碼4個鐘去到agent位於機場附近既公司, 之前agent同我講可以帶D草同糧俾rabbit仔, 但去到佢又話手提籠內唔可以擺任何食物, 我唯有擺低D草同糧叫佢俾rabbit仔響上機前食
至於水, 佢俾我掛rabbit仔既水樽響籠出面, 另外會有個水兜響籠內, 但我響香港接返rabbit仔時, 我地既私家水樽已經唔見左, 我地認為個水樽應該係響英國時已經俾人拎走左
另一樣令我好不滿既係, 佢地用白紙碎同報紙舖響籠底, 我問可唔可以拎走報紙, 換上我自備既尿片, 但佢地話唔可以拎走, 我只可以將尿片舖響報紙上
-香港入境
響班機抵港後, 大概要等1個鐘先可以接返rabbit仔, 要去超級一號貨站接佢(離機場10分鐘車程)。去到首先要上3樓拎張提貨單先可以去貨區拎rabbit仔, 接左rabbit仔之後要再去貨站內既漁農處同海關部檢查, 填form之後先可以帶佢走, 成個過程用左1個鐘
Rabbit仔篇
1.) 事前準備
我由決定帶rabbit仔返香港開始, 已經不斷訓練佢聽嘈音, 佢開頭聽到遠處既風筒聲都會驚, 後尾我吹頭時佢直情跳上梳化同我一齊吹, 連吸塵聲都唔驚
我亦帶左佢去2次公園玩, 家兔協會話, 要俾佢知道困響手提籠唔代表要困一世, 困完一段時間就有得玩啦
我仲成日同佢傾計, 話佢知搭飛機唔使驚, 爸媽唔係唔要佢, 好快就會接返佢等等, 雖然唔知佢聽唔聽得明, 但都同佢講左先
2.)香港接返佢既情形
見到佢個刻我都喊左出黎, 因為佢個樣好攰, 對眼仔好似’突’左出黎咁, 好唔開心既樣, 而且籠入面佢D便便雖然金黃大粒, 但有D就俾尿尿浸到粉粉地, 搞到佢手腳都好污糟
好彩漁農處好好, 借左間房俾我地清理佢個籠, 我一早準備多一塊尿片, 扔走報紙同抹乾淨個籠後就舖返張新尿片俾佢, 我亦準備左D糧俾佢食, 但佢就唔肯食。不過佢見返我地之後, 好似情緒好左好多, 個樣都變返正常。搞掂手續後, 我爸爸車我地返屋企, 我放左個籠響車椅上, 沿途我開住個籠, 自己就踎響地下, 俾佢望住我, 佢既情緒又再好多D
返到屋企後, 籠已經準備好, 我就咁將個手提籠放響地下, 唔想夾硬抱佢出黎, 佢好快就自己走左出黎, 好八卦咁響我屋企周圍行下聞下, 但都冇入籠。我俾佢玩左一陣就要抱佢入籠, 因為趕住要出去買返個水樽俾佢
之後返到屋企, 見到佢有食草, 識去廁所, 但便便係軟既。過多1,2個鐘後情況正常哂, 有返硬既金黃便, 有食草, 有飲水, 只不過仲係驚驚地, 唔肯出籠, 我就響籠邊陪住佢, 再過多陣佢終於肯出籠啦 |
|
分享
收藏
支持
反對
