兔兔絕育問題 (好長的一編文)

雖然早於一個月前已經 book 了時間今個 weekend 帶小兔仔仔去做絕育手術...
可惜嘛, 近幾天心裡突然有個疑問...
就是究竟小兔子本身是否願意被人開刀移除自己的生殖器官...
其實諗諗吓...
好多時我們人類要帶自己的寵物去絕育...
其實根本好似沒有考慮到小動物牠們本身的意願...
只是一心想着我們是為了牠着想...
想牠健康, 想牠乖...
但這是真真正正為牠們着想嗎?
還是我們只是一廂情願...
將人類們認為是「對牠好」這個 reason 套在牠們身上?
牠們是否真的覺得這樣是為牠們好?

先以「絕育會令小兔更乖巧, 更容易與人/其他動物相處融洽, 減低牠們的侵略性行為, 減少牠們霸地盤而導致噴尿」的原因來說...
這一切一切都好似是從我們身為主人的利益上出發來說...
如果換轉我們是小兔的身份...
其實再想一想...
好似都沒什麼問題呀...
因為這就是我們的天性...
為何要強迫我們做你們人類認為好的那一套?
再簡單點...
譬如說有天大家打開報紙...
發現有一則新聞是:「某女朋友為了要男朋友對自己千依百順, 於是下迷藥替男友做手術, 令他思想改變成自己要的模樣」...
大家會否覺得這個女朋友是變態的?
換句話, 我們要拿小兔去做手術...
因為我們想牠變乖...
也是變態行為嗎?

再說「我們要替牠絕育, 因為我們想牠健康, 減低患癌機會率」這個 reason...
假如有一天我們睡醒...
發現自己身在醫院...
& then 醫生告訴你他把你身上某部位切走了...
原因是你家人覺得這樣你会健康點...
你又會有什麼反應?
又或者女士們...
如果所有人都說只要你把自己乳房切掉...
那麼你便沒什麼機会患乳癌了...
你們又會否即刻跑去把自己的乳房切掉??

我知道這樣說好似有點那個兒...
但自己現在的感覺就是自己跟自己打杖咁...
諗咁到底什麼才是對小兔最好...
因為有好多時侯...
自己認為對那個人好的事...
那個人並非真的會咁諗...
所以, 小兔是否真的想去絕育呢?
小兔又是否真的覺得絕育是為牠好嗎?
還是只會覺得你無端端要我去受苦?

除了以上兩個大家要替小兔絕肓的原因...
還有其他更加好, 或更有科學根據的原因嗎?
麻煩大家比下意見...

我自己第1個理由 .
因為我唔想  我無幫佢地絕育 而要受以下圖片既痛苦 ..
http://www.hkrabbit.org/?p=3309      內有令人不安既圖片...
我唔想要佢地身體有機會出現依個變化 ..
兔仔辛苦  可能仲有會生命危險...   


我知兔仔可能會覺我無喇喇帶佢做手術 .. 整痛佢..
但我身為佢地媽咪  我有理由要佢地身體好..
就好似人咁..   細路係要打!!!  要罰!    ((但好明顯依個時代既細路係唔打得-.-
到大個先知  其實媽咪都係為我地好..
其實痛在我身  痛在佢心  #^3_002^#



絕左育係會乖D  ..  依個唔係我第1個理由..
會乖D 只係1個獎勵...  對我黎講..

我只係希望佢地身體 唔會受依啲痛苦..  
就算佢嬲我..  只要見到佢身體健康..我都心甘命底!
---------------
我星期日都帶佢地絕育啦#^37^# .      我都好緊張.. 一定好痛痛#^37^#
痛在兔身   傷在我心

[ 本帖最後由 小小夕 於 2011-7-22 04:10 AM 編輯 ]

當初我帶Hill仔去做絕育
完完全全係因為佢健康著想

坦白講 你帶唔帶兔兔去絕育 我地冇權迫你去

你話我地將自己既諗法套左落兔仔度
其實你咁講 好多野都係
邊個話俾你知兔仔想跟我地住 可能佢鍾意住郊外呢...

我覺得我地身為佢既主人 我地應該盡我地既能力俾最好既兔兔

帶兔兔絕育 我覺得為佢健康呢個原因好足夠
點解仲要搵幾百個理由去支持自己既行動
原因只有一個 因為你覺得絕育唔係一件好事

其實我之前都有諗過呢個問題..
我既想法係, 如果一個女人, 佢係健健康康既, 醫生唔會批准佢為左預防患病同埋佢唔諗住用個子宮而幫佢切除子宮.
如果一會普通人, 都唔會有人贊成佢好地地去捱一刀
只會係發現有問題既時候, 先會去處理去醫.
另外, 好地地, 要受個風險, 好似無辜辜咁...

之不過又咁講,
睇到好多兔患病痛苦, 又真係好心痛, 唔想同一件事發生係自己既兔兔身上
同埋兔兔唔識好似人咁, 有咩唔舒服, 痛會識得出聲話畀我地知

所以我覺得呢個問題真係無咩答案. 兩個諗既方向都唔係無道理
最後點做, 就身為主人既決定, 如果自己諗法係傾向想做, 因為聽左其他人講而"免力"強唔做, 之後自己個心一路唔舒服就無謂low.

個人黎講無咩既定立場, 有呢兩個想法係因為之前聽過兩句, 令我思考呢個問題
講咁耐都只係講下自己感覺, 並唔係想說服任何人做任何事.

"貓咪身體情況太差, 要佢繼續生存只會受苦, 幫佢安樂死係因為人道"
"病人雖然動彈不得, 不過都唔可以因為佢要求而幫佢安樂死, 因為咁唔人道"

呠呠都好快就會去絕育，不過我又沒諗咁多，因為一諗到唔絕育患癌率好高，第二時佢有病果個慘樣，我就知唔絕唔得。
其實都唔到我地諗咁多，好贊成Hill媽既point,其實當我地帶兔兔番屋企果時已經沒問過佢地意見，不過帶得佢番黎，我就會俾我認為係最既野佢

其實我本來都係黍緊星期日同機機做絕育，但我已取消booking, 我思前想後，都係唔做，原因有幾個，（一）：機機係男仔，如果係女的話，我一定同佢絕育，因為睇過資料，女仔生病的機會太大，而且之前Dr.MA 都有講過男仔可以睇返主人的去向，做唔做絕育。原因（二）：做手術總會有一定的風險，基於原因（一），我無啦啦做嘜要機機受這一刀呢！原因（三）：手術後的照顧，雖然我已準備休息三天，全天候睇住，但自己仍是很擔憂機機未能適應平時的生活習慣（我無欄住機機，係屋企自由活動）。最後原因係機機只係得閒Un 嚇，又無話周圍柯尿，又好乖無咬人，脾氣OK, 所以基於以上原因，我都係唔幫機機做絕育，希望佢未來健康成長，開心愉快過佢的兔兔人生。如果真的不幸機機有病，到時我一定全力救佢，其實佢之前都差啲上天堂，一次係上呼吸感染，一次就肚柯，腸停。當然上述所說的純粹個人意見，不要作參考呀！

不能不認同 Hill 媽那句...
當初小兔都冇得選擇跟了我們回家...
但又不得不認同自己都好似 super4 這樣的想法 <-- 因為自己的小兔都是男仔...
所以, 自己因此爬了好多不同出處的文章...
甚至科学文獻...
看看幫男仔兔絕育還有什麼好處...
估不到找到的一篇說:
"castration-induced visceral obesity affected negatively the lipid profile and insulin sensitivity and/or responsiveness"...
即是男性兔子絕育後患上肥胖症跟糖尿病的機會率比正常兔高!
(文章出處: http://www.ncbi.nlm.nih.gov/pubmed/20542306)
~_~"

不過其實講到尾...
我相信這裡的每一個人...
出發點都是為了自己的兔兔好...
否則唔会花咁多時間搜集有關兔兔的資料...
自己會再搜集多d資料...
看看男性兔子絕育仲有什麼 pros & cons...
希望可以在日子來臨前為他做個最好的決揀!