今次寫呢篇文章,想同大家分享由我發現我隻女小賓女意外懐孕、誕下6隻寶寶既一切經歷,解答你地既問題、疑慮!
一個意外
係2009年5月份,小賓女當時8個月大,準備係6月份做絕育!我帶左小賓女去一間pet shop剪毛,事前我己經同pet shop個女仔講清楚,個女未做絕育,所以如果佢行開/有客人,就一定要放返落袋!其間我出左去食野,返去再睇小賓女既時侯,見到店鋪裡面隻貓貓侏儒兔仔追住佢玩,但我冇為意!直到2星期後,我同exbf發現小賓女既行為有少少改變,不停擔住堆草行嚟行去,又拔毛,有少少緊張!當時我以為隻女未做絕育,出現假懷孕現象!點知exbf突然記起隻女之前同pet shop隻兔仔玩過,就開始懷疑佢會吾會真係懷孕!我打電話去問返pet shop個女仔,原來隻貓貓侏儒兔仔未絕育,個女仔又吾記得我隻女都未絕育。我地估計小賓女好大機會懐孕,所以做定準備迎接BB!我地有一間空房,用一個大圍欄(籠放係圍欄裡面),地下先鋪尿片,再用膠墊!籠裡面就先鋪尿片,再鋪毛巾!2星後,有一晚放工返屋企見小賓女生左6隻兔BB!
照顧篇
兔媽 : 由於生BB,又要餵奶，身體會比較弱! 每一日比少量A草、A糧，亦可以餵菜!
兔BB: 正常嚟講，兔媽每一日會喂BB飲2次奶! 每次最好洗手帶手套先摸bb，(因為怕對手有細菌)，餵奶果時唔好打擾佢地，過一陣先抱BB睇下有冇食飽!除左磅重，你可以摸下BB個肚係咪漲既!如果真係未飲飽奶，可以兩個人幫忙:一個人小心返轉兔媽係大脾,另一個人將BB放係兔媽乳頭附近，BB會識去飲!
注意:
1. 餵奶時間以外，兔媽未必會痴實BB,，兔媽自己都需要休息!
2. 建議帶兔媽做body check!
飲食篇
出世至2個月大: 飲奶
3星期至3個月左右: 飲奶+開始食草 *除左T草外，亦要放適量A草!
*(6個月以下既兔兔係無限量T草、少量A、早晚2湯匙A糧)
*(6個月以後停A草，將A糧慢慢減少溝T糧，直到轉哂T糧)
成長篇
BB會慢慢出毛、開眼! 頭幾個星期，BB多數都會堆埋一齊玩/瞓覺! BB開始長大，會多d活動，比較百厭!可以嘗試教佢地去厠所!大約3個月大左右,要帶BB去做body check!
注意:由於未夠期絕育，為免發生意外，要將BB分開性別居住! 呢個時侯可以留意一下同性別之中，有冇邊2隻以上係玩得埋! 如果冇問題,可以嘗試放埋一齊往!不過要緊記:BB細個夾得到,並吾等如長大後性格會繼續夾得到可以一齊住! 如果真係夾吾到,一定要分開,無謂勉強造成意外!
我既小朋友自己有一間房! 6隻BB長大後，因為8隻(仲有小賓女、藍藍)唔係夾得哂，總共分開左5個大籠1個圍欄，通常都係輪流出嚟玩!
金錢篇(7隻賓尼兔必需品,以最便宜計算)
籠:$160(jolly 籠)X 7 = $1120
水樽,食物碗,草架,厠所,梳+剪刀,消暑/保暖用品:depends
每月支出
-5箱 22lbs Momi 1 st cut T:$380 X 5 = $1900
-菜/小食:depends...
-(如果兔兔未學識去廁所)50塊裝尿片:$100 X 5 = $500
2.醫療
- 絕育(必需):$1000(仔仔);$1500(女女)=$1000 X 7 = $7000
- 兔兔生病看醫生:不能預算...
3.雜費:depends
心理篇
我絕對唔建議比兔女生BB，一來對兔媽身體有影響，二來實在太多事顧慮! 自從6隻BB既出現之後，好多生活、習慣同環境都要改變，經濟亦好重要! 當你見到小朋友可愛既同時,請你考慮清楚到底自己有冇能力、耐性同心機去愛去照顧佢地一世? 有冇心理準備要犧牲要改變自己既生活方式/習慣? 我曾經有好一段時間心理生理壓力好大,每一晚都瞓吾到!即使入睡,每一個鐘我都會自動彈起身去睇小朋友!放工即刻返屋企、即使放工約左人都要返屋企餒餵左小朋友,摸下佢地先、朋友聚會太夜，我會返屋企先、冇得去旅行等等...小朋友有事,無論點都要撐住...
另外我亦發現好多情侶一旦分手，小朋友往往會成為犧牲品、被遺棄!我同exbf分開之後,主要都係得我一個人照顧，有人勸我放棄，因為小朋友令我放棄左好多...但無論如何，我都會照顧、愛護小朋友一生直到終老，不離不棄!人既錯本來就唔應該由動物去承擔，更何況係有感情?
愛兔養兔，用口，更要用心!
一生既承諾,你做到嗎?
決定要負責任,就要負一世!
[ 本帖最後由 stephanielwk 於 2011-8-7 12:25 AM 編輯 ] |
|
分享
收藏
支持
反對
