本帖最後由 cordede 於 2012-12-12 02:12 PM 編輯
其實我都唔知post呢度岩唔岩...
如果post錯就麻煩版主講聲我知! 唔該晒!
11月28號同我地一齊生活左差唔多10年既寶寶走左...
大喊完一場過後...
就即刻上網搵寵物善終服務公司...
因為寶寶係o係大圍珍獸留院個陣, 夜晚6點半走既....(當時我岩岩收工...就係正公司門口收到呢個電話....)
姑娘就同我講, 可以聽朝先黎接寶寶同埋傾下點處理寶寶既遺體, 因為診所收7點,
咁佢地會幫我將寶寶先放係雪櫃防止腐化...
其實早係寶寶前幾年大病個陣...
個度既醫生已經問過我要唔要幫寶寶安樂死...
咁我地當然say no啦!
不過媽咪都問定醫生, 如果寶寶真係唔係度的話...佢地會點處理?
姑娘就話一係放低寶寶遺體比佢地,
佢地會收返少少服務費,
然後會連埋其他動物既遺體一次過比食環署去收,
不過據我所知,
香港政府已經無左動物集體火化服務....
即係講到尾, 最終我地既寵物都只係去堆填區同d垃圾放埋一齊....
所以當晚我就係咁睇資料...
最終揀左"寵豬天國"...因為見佢好似比較出名同多人推介~
當時大約8點...
我拿拿臨打去佢地既24小時接收遺體熱線...
個女仔問左少少關於寶寶既資料,
然後就問我想約幾時+去邊度收+係邊間分店幫寶寶火化...
咁我本身想約9:15...但個女仔話司機最早10點先去到大圍...
同埋問我係咪係大圍珍獸接寶寶, 如果係的話到時司機會識同佢地聯絡,
叫我可以唔洗特登去診所等...
咁OK啦...約好左, 同埋我揀左係九龍灣火化...
第2朝大概9點半我就去到診所接寶寶同比埋D住院費...
姑娘問我搵左善終公司未, 我話搵左, 約左10黎接佢~
咁姑娘就話:"需唔需要見寶寶最後一面?"
咁當然要啦!
然後姑娘就安排左其中一間診症室比我地同寶寶道別...
大概10點度,
寵豬天國既司機就到左...
由於診所係用膠袋入住寶寶再放雪櫃,
所以個司機連埋膠袋, 將寶寶放係一個鋪左毛巾既大膠箱度~
然後就放入貨van個雪櫃度~
至於寶寶成個善終服務費用係$880..
大家可以選擇比全數司機 / 比$100 or $200訂金 / 火化當日先比錢~
(不過最好預早係電話講明, 廢事到時尷尬啦...)
然後我就再打電話去寵豬天國預約火化時間...
因為九龍灣比較full既緣故,
要假日的話9號先有位火化...咁唔緊要啦...
反正佢地一樣有雪櫃keep住寶寶,
咁我都有問過雪得耐對外觀會唔會有影響,
個職員都講明唔會有咩影響~ 咁我就放心喇...
到左9號10點半...(職員話11點係火化時間, 所以10點半要去到~)
我遲左10分鐘先到...
因為個地方都唔算易去...
要搭shuttle bus 去megabox再行10-15分鐘路程....
上到去,
姑娘安排左我地入去vip房度同寶寶道別~ (其實個個客人都係去vip房~)
等左陣, 職員就用個比狗仔訓覺既籃裝住寶寶出黎...
個籃度有晒厚毛巾比寶寶訓~
其實我睇返佢地本目錄介紹...
佢地話係主人上黎前, 會幫寵物用消毒水沖涼+梳洗~
所以我地去到當日,
寶寶好乾淨, 同埋唔似係診所個日成身雪到硬晒...
直頭同平時訓左覺個樣無分別, 只係個身比較凍....
過左陣, 職員就黎通知我地火化已經準備好...
咁佢就帶左我地過隔黎工場,
將寶寶放左係for火化既鐵兜上,
然後叫我地放少少食物/花做陪葬品...
我地就帶左寶寶最鐘意食既提子去...
跟住師傅就放入爐, lock門,
然後職員就遞左個開火制比我媽咪禁...
我地實在唔忍心睇...
所以即刻快步行返出去....
比完晒錢之後,
職員話以寶寶體積, 1.5hrs就會完成火化...
問我地等唔等埋d骨灰....
再唔係可以辦公時間內幾時上去拎都得~
由於我地未決定將寶寶放係邊...
所以就遲d先去拎~
至於個$880, 本身已經包埋骨灰aum~
同時個度亦有靈位可以租,
$1200至$2200一年,
既然都唔係貴...
所以我地決定幫寶寶租個靈位~
加上我地見個度環境唔錯, 又多小動物放左係度....
咁寶寶係度住, 起碼有其他動物陪佢玩~
成個過程大致上係咁lu...
我同老公過幾日先上去拎骨灰同租位...
到時再update啦~!
|
|
分享
收藏
支持
反對
希望兔仔去世後亦可以係另一個世界開開心心咁過