本帖最後由 Kayi 於 2013-4-26 05:52 PM 編輯
本來我係有兩隻兔兔,叫冬冬同樂樂
冬冬係上年十一月,因為突發事件而離去..
因此,我將所有既心機同時間都放落樂樂身上
樂樂,剛剛兩歲生日,算係後生既兔兔..
正常係呢個年紀既兔兔身體機能各方面都發展都好好..
係二月頭,新年前夕,樂樂忽然間食小左野.. 但係依然好有精神,有便便..由於係新年,所以無醫生睇.所以我都係用屋企看門口既藥黎餵佢,當作一般腸慢腸停既情況處理..
到左年初二,因為診所開門,所以我都立即帶左樂樂去睇醫生.. 情況就如我所料,係腸慢. 只要食返藥一星期後覆診就可以… ( 當時體重大約2.1kg )
一星期後覆診,醫生話已經無事. 但係因為樂樂既體重係可以再重d,所以就食南瓜蓉增肥.無事都唔洗再黎見醫生 ( 當時體重大約2.06kg )
係呢一個星期面,樂樂開始唔食草.. 不停等食南瓜蓉,同埋只係食返自己既便便..精神一直都好好,非常精神! 由於佢唔食草,只係等野食..所以我都幫佢停左南瓜蓉,同時亦都約左再返診所
過左幾日後,同返醫生講呢個情況.. 磅重後發現樂樂既體重只得返1.89kg,輕得太多,所以要驗血.. 驗血結果發現有小許既肝同腎既指數有小小偏高..可能係因為肝病所以唔食草,亦都可以係因為唔食草而有肝病.. 因為只係好輕微既肝病,所以只係食肝藥就得.
兩星期後覆診,體重再下降,趺到1.73kg. 而肝指數上升左一倍,亦都發現有貧血.. 打左肥仔針同一支補血既針.. 因為樂樂keep住食肝藥但係體重同肝指數都無受到控制,實在唔尋常.. 所以醫生提議如果下次覆診,肝指數再升高就要照埋x-ray,檢查下肝臟出現咩問題. 醫生亦都叫樂樂要開始食三寶.
三星期後覆診,體重無下降.醫生話樂樂比起上次覆診時無咁瘦,仲話樂樂牙仔,腸聲同毛色都好! 到左驗血部份,發現肝指數又上升!由三星期前既157上升到263!! 貧血又降低,由26.6下降至25.5. 因此要照x-ray
x-ray顯示出,樂樂肝入面有點黑左,係gas.. 應該係有寄生蟲入左肝臟而引致.. 成因有可能係食左有機菜入面既寄生蟲, 亦都有可能係自身問題.. (我每次比菜兔兔食都一定會用生同熟水浸,前前後後都一定有一小時以上既浸菜時間)
宜家呢個情況,醫生會加強肝藥,同埋食其他藥黎對抗寄生蟲,希望食藥可以令到佢消失.. 如果之後仲有gas 或者情況再差,就要做手術..而因為肝臟有大量血液在內,要幫兔兔開肚切除有寄生蟲的肝葉是非常危險同大既手術.所以盡可能都唔會做手術.今次加多左好多藥,亦都打左肥仔針都補血針..
兩星期後的覆診,體重依然keep住. 不過今次無驗血同照x-ray. 因為醫生話藥物唔會咁快發揮到明顯既效用. 但係照宜家既觀察,宜家比起上次覆診都好左.. 各方面既情況都有所改善. 要再觀察,兩星期後再覆診..
其實呢個病主要既病因係咩,真係唔知.. 不過醫生就叫過我盡量唔好比有機菜.即使係普通既菜,最好落小小鹽落去浸菜,之後再用返食水黎過一過水. 確保安全.
有人會用專門洗菜既清潔液,呢樣我都問過醫生. 因為清潔液入面有好多化學物質,所以都唔建議用.
今次打呢篇分享主要係想各位兔媽兔爸多加注意自己小朋友既健康..好彩樂樂呢個病發現得早,可以及時醫治. 其實樂樂呢個病係非常十分之罕見, 據醫生所說,係香港只有兩三個兔兔有過呢個病.. 所以藥物對樂樂有無幫助,都係未知之數.... |
|