本帖最後由 還肥仔一個公道 於 2013-8-28 05:32 PM 編輯
我隻兔仔死左.就係呢間野延誤我時間,請大家為我地講句公道說話
我都知件事比較長,請求大家耐心睇完><
兔仔名叫"肥仔",今年6歲,係一隻獅子兔,性格非常乖巧,肯比人抱!
佢既生活習慣比其他兔仔特別,由於佢好細個既時候,跌親撞倒兩隻門牙,所以之後生番出黎都食唔倒草,
只食oxbow兔糧及油麥菜,同埋佢每日會飲600ml水或以上!
25/08/13(星期日) 下午4:10左右,我突然發現肥仔身體發軟,不能自行站穩,我抱佢出籠外,佢既表情非常難受,
我當時覺得佢情況好不妙,好似就黎死咁,為左爭取時間,所以我無得選擇一直睇開既dr ma...因為dr ma果度太遠,我驚趕唔切...
所以我即刻上網搵,然後打電話去附近離我身處距離450米左右既"新蒲崗動物醫院", 對話如下:
我第一句問: 你地識唔識醫兔仔?
醫院: 識呀,你隻兔仔做咩事?
我: 佢...唔知做咩..好似就黎死咁,企唔倒..我都唔知做咩..
醫院: 咁你依家帶佢過黎!
我一落樓,即刻跑,一秒都唔敢停...
一去到醫院,原來佢地今日岩岩開張,每個人都好開心,開緊大食會....
我即刻將寵物袋遞比佢地,佢地拎左肥仔入醫生房,之後叫我填左資料先,
填完之後,叫埋我入醫生房,入面有兩位獸醫,一位護士!
獸醫第一句就話佢脫水,就唔知幫佢打咩針,然後護士幫佢磅重,探熱,話佢體溫過低,就搵風筒吹佢,
之後問我基本資料..
獸醫: [佢係幾時開始有呢個情況?]
我: [係今日先開始,尋日都無事嫁]
我跟住就話比佢地知肥仔睇開dr ma,同佢地講可以打去問病歷,
佢地即時反應: [邊個係dr ma 呀?]
我: [下,dr ma wor...]
3人你眼望我眼: [唔知wor]
我: [咪就係醫兔仔最出名果個醫生]
可能我就係最尾果句得罪左佢...之後佢處處質疑我...
獸醫: [佢有食野?]
我: [有呀,佢尋晚都好正常,跳黎跳去,食左好多野]
獸醫(摸肥仔個肚同附近): [我都摸唔倒佢個肚有野,咩都無嫁渦]
我: [無理由格,我尋晚先比左好大兜野佢食]
獸醫: [你見住佢食牙?] 我話係~
獸醫: [佢咁瘦,係營養不良渦]
我: [下,無理由嫁,因為佢食唔倒草,所以佢d糧係無限量加嫁,一無就加嫁喇..]
獸醫: [總之我依家摸就係咩都無]
跟住佢地問我咁打唔打算去dr ma.度睇,(我見佢地咩都做唔倒,又不斷質疑我,我就話會一陣去),
咁佢地就叫我打電話,話唔係即時有得比我睇,要book(由此可見,證明佢地根本判斷唔倒原來肥仔已經好嚴重)
跟住我即刻打去dr ma度,講左基本情況,但因為要問九龍動物醫院攞病歷,所以等護士覆電話!!
之後我都係覺得無理由所以就問另外一個態度比較好既獸醫
我: [點解佢會營養不良嫁,真係唔會嫁渦,佢平時食好多野嫁,點解會咁?]
獸醫b: [可能係佢d牙唔好,無咬碎d糧就成粒吞,所以吸收唔倒入面既營養]
獸醫(摸肥仔隻腳): [佢d肌肉都菨縮哂,佢係今日先係咁?有無跌過呀?]
我話: [係今日先係咁,佢尋晚都無事,跳黎跳去嫁,從來無跌過]
獸醫: [同埋佢依家都脫哂水]
我: [其實真係無理由,因為佢每日都起碼飲600ml水]
獸醫: [下,600ml?咁我唔知啦,你自己睇]
當時個獸醫就不斷圍繞呢d好質疑我既問題..但當時我咩都無得揀,只可以選擇等待....
途中,獸醫話佢個肚咩都無,d腸唔可以停,就係咁塞草粉比肥仔食...
又等待...
跟住佢地再幫肥仔探多次熱之後就話我可以番去,咁我就問,
我: [咁肥仔依家情況係點?]
獸醫: [依家就可以帶佢番屋企,維持佢既體溫,餵藥佢食] (佢地咁樣講,完全令我覺得肥仔係唔會死...)
跟住呢個時候dr ma護士打番比我,護士已經話可以即刻過去...咁我就覆話我系呢間醫院走就可以即刻過去!!
收線後,
獸醫: [有無位比你睇?]
我: [有呀,我依家即刻過去]
獸醫: [好,咁你去dr ma度我就唔洗開咁多藥比你,開草粉呀益生菌比你啦]
我: [好,唔該哂]
*** 獸醫: [咁就好啦,反正呢個唔係我既專業,你去搵番dr ma(意思是,醫治兔仔並唔係我的專業)]
*** 獸醫: [同埋其實我地呢度無咩設備醫兔仔] (我當時聽倒呢句果陣,我成個心情真係崩潰,但我都無出聲,淨係想快d走,去dr ma度)
跟住我就好無奈咁出去等攞藥...係咁等,係咁等,等左成15分鐘,
到我問: [究竟我仲要等咩?]
之後就有護士攞左包草粉,一枝益生菌同針筒比我,同我講針筒幫我磨過...
(再第二次證明佢地根本唔識醫兔仔,如果佢地係知道肥仔咁嚴重就唔會要我等成15min,完全浪費哂肥仔既黃金時間)
攞完藥比完錢,我即刻衝出門口搭的士,系途中,我一直摸住肥仔叫佢加油...
差唔多落車,佢撐左幾腳....抖左幾啖氣就無左氣息......我D眼淚已經忍唔住....但我係咁按佢同佢講野,
一落車我即刻衝入診所,同護士講我頭先已經打過黎,但肥仔唔知係咪死左.....
護士睇一睇,即刻大叫dr ma,然後衝左入手術室,
一路做一路同我講,吊鹽水....打強心針.....心肺復甦......
5分鐘左右,dr ma同我講肥仔已經離開左我地...我當時係咁喊係咁喊,但都不忘點解肥仔搞成咁,
冷靜左,我即刻同dr ma講頭先系果間醫院發生既事,以下重點寫出dr ma既診斷:
1)佢既身型係屬於正常,並唔係過瘦
2)佢個肚同附近位置有野食,有糞便,並唔係咩都無
咁跟住我問dr ma如果係佢遇到咁既情況佢仲會點做?
佢話首先會吊鹽水,呢個係一個好好既方法...
我就知道之前果個獸醫根本係唔識醫兔仔,連吊鹽水咁基本既方法佢都唔識做....
我十分懷疑呢個醫生根本對醫治兔仔係零經驗!!!!
同dr ma傾左10分鐘左右,我愈唸愈嬲,即刻出門口打番去新蒲崗動物醫院,
我同佢講我搭的士方途中肥仔已經死左,就係因為佢地根本無經驗醫兔仔,但為左賺錢又要同我講識醫,
我要佢地比一個合理交代我,同埋我話七百幾蚊張單我唔會比,又唔識醫,拖延肥仔既時間,搞到佢最後死左,收錢係完全唔合理!!
我同佢地通話左45分鐘,其間總共有4個人不停辯駁,最後姓何既男負責人完全唔係一個對待客人既態度,不停話[呀小姐,xxx,呀小姐牙,xxx]
最後佢話26/8星期一醫院休息,咁我比左兩日時間佢,27/8星期二要覆我合理解釋同張單既情況,佢都承諾左!!
26/8星期一下午,無啦啦有個護士打比我話覆番我,話佢地已經開完會商討左,醫肥仔既過程會寫番張野寄比我,而肥仔唔係系醫院入面死,所以張單唔會退...
咁我就話草粉益生菌果d我全部無用無開,同埋就算係,你唔識醫又同我講識,最後就係因為你地拖我時間,搞到肥仔最後死左,仲有你地居然臨收錢先同我講
1) 呢個唔係我既專業 2) 其實我地呢度無咩設備醫兔仔
講呢兩點就已經非常過份,任何主人都唔會接受,佢就同我講左一句"唔好意思"(亦已經証明連護士都覺得咁做係唔岩)
我話咁你收我錢點會合理??正常人都唔會接受!!!!
我依家就係等緊你地合理答覆同埋承認處理手法唔恰當,我同佢地講我已經寫緊信,如果再唔比一個合理解釋,我就會去獸醫管理局投訴!!!
跟住佢話會即日26/8覆番我電話,但直至依家我都未收倒任何電話....
直至現在,呢間醫院仲唔肯承應自己既過失,只有個護士為曾做過既事同說話講左句"唔好意思"....
到現時我睇番佢地既網頁,基本上無一個資訊係同兔仔有關.....
我已經一早打去問,已經話肥仔就黎死,最後就黎收錢先同我講無咩設備...................
我好後悔,好自責,點解我當時唔即刻搭的士去dr ma度....
我直至依家呢一刻都未接受倒肥仔已經離開左我,我d眼淚仍然不停流,不停流...
我系呢度請求大家用半分鐘時間share呢件事比你既朋友,等所有人都知呢間係一間極不負責任既醫院,還肥仔一個公道!!!
另徵意見,
1) 我應唔應該寫信去獸醫管理局投訴?勝算如何?
2) 我好唔好要佢地退張單?會唔會影響獸醫管理局既裁決?
定係裁決之後先要佢地退錢?獸醫管理局既律師會唔會幫我一把?
3) 我依家仲可以做d咩?
我只係一個普通既市民,一個小小既寵物主人,我一唸起肥仔,我d眼淚就不停滴落黎,我好辛苦......
我唔知可以點做,我懇求大家比意見幫下我,十分感激您地!!!
另外如果有人有經驗真係可以幫倒我又或者有義工可以陪倒我,麻煩你地打比我(再pm電話),我真係遲早抑鬱...我依家真係好需要有人幫我一把...求求您地幫下我,先感激大家既幫忙!!!! |
|
分享
收藏
支持
反對
