兔仔仔絕育-- 開心分享

兔仔仔7個月大，係啱啱過咗既星期六做絕育手術，可能係男仔關係，神速康復！所以開呢個POST勉勵下將會帶兔仔/女絕育既兔爸/媽。不過我太長氣，為咗方便D睇，分咗三篇POST，分別係事前準備、過程及總結。

出發前準備：

外出袋

外出袋本身有木板，平時鋪carefresh，因怕傷口會沾到carefresh不舒服，所以今次改鋪尿片再加毛巾。因兔兔會咬尿片，所以先將一整塊尿片包木板，然後再用長毛巾包實，兔兔就唔會咬到尿片，長毛巾又可當軟墊。

VETBED

兔協姐姐話做完絕育手術有VETBED會令兔兔舒服D，草可以放埋係VETBED上面，擺埋糧，等佢易D食。兔兔冇用過VETBED, 所以早幾日放佢出來玩先會將VETBED擺地，放D草上去引佢去，等佢習慣。結果係兔兔會咬VETBED, 用咕臣套套住就解決到問題。

其他物品

驚兔兔唔適應診所既休息籠，帶咗厠所、草、水樽、陪兔兔既公仔去診所，等佢聞到自己陣味，結果得水樽同陪兔兔既公仔有得留低係診所，但只係以備不時之需放係個外出袋先，其他姑娘話唔需要，因診所有。

輔導

前幾日開始成日同兔兔講要去醫生到，大過咗就會健康同靚仔，不過會痛一兩日架，要叻叻豬同加油呀。

過程------

診所：

兔爸帶兔兔去，12:00到達，姑娘做簡單檢查，摸吓兔兔、磅重，解釋因兔仔性格敏感，最好配埋止痛藥等兔仔舒服D，跟住簽埋同意書，話等電話接番兔仔。姑娘有問需唔需要見醫生，因醫生好忙，如果想見會安排。最後覺得姑娘都解釋得好清楚，所以冇見醫生。

同一時間我係屋企洗籠、鋪VETBED。

16:00 收到電話話兔仔醒緊，可以18:00去接兔仔。

18:00 同兔爸一起到達診所，等咗一陣見姑娘抱我隻兔兔出來，解釋傷口係邊，每日要檢查有冇紅腫。其實手術做得幾好，因唔覺傷口係邊，唔駛帶頭套。我話想配埋草粉，姑娘話可以唔駛因兔兔已開始食草同有幾粒便便。最後我都想買個安心，配埋，草粉係蘋果香蕉味。埋單共$1,470。最尾見到醫生收工行出來，同我哋SAY BYE。

回家後：

19:00 返到屋企。一返去抱兔兔入籠，但佢就係咁踢~.~，入到籠仲烏低頭，用好戒備既眼神啤住我。我唯有同佢講，之前咪同你講咗要去醫生度既，係會痛一兩日，不過會好快好番啦！然後加草係VETBED上面，擺埋糧，等佢易D食。平時用既草架都照擺少量草。

19:00 – 21:30  期間兔兔都係唔習慣VETBED係佢籠入面，不斷抓張VETBED。我唯有攞開，改鋪草係佢訓開個位。但佢好堅持，將D草推開晒先訓。不過應該訓得唔舒服，成日起身又訓低。最後我加番VETBED俾佢，同佢講有墊墊會舒服D，佢又接受到冇再抓。點知訓咗一陣，就改訓廁所 (佢平時唔會訓廁所)~.~。我有得佢，只要佢舒服就OK。期間有食一兩條草，反而冇食過平時最愛既糧。

21:30  仲未見有VV 同便便，草同糧都冇乜點食，決定餵止痛藥同草粉。用毛巾包住餵，先餵藥，唔肯自己食，要夾硬餵，但都食晒。草粉就唔肯吞，係個口到跌番晒出來，可能我都餵得唔好，結果只食咗2ml到。唔勉強，加少少草係廁所，再抱番佢入籠休息。

2130 – 2300 繼續係廁所休息。

2300 - 2330 開始狂食草，專食葉，過咗一陣開始有便便，超開心，放心晒！

2330 – 0130 開始正常番，係VETBED上貴妃躺，成日食草但依然唔食糧，有好多便便，雖然便便較細粒。

第二朝約0800 起身見佢好正常，D糧都食晒，再加草俾佢都係咁食，有飲水，不過好奇怪好似未有VV。決定幫佢換廁所，睇吓D便便點，同埋確定係未冇VV。發現真係未有VV，VETBED都冇水漬，開始擔心。但anyway都換個廁所俾佢(有兩個一式一樣既廁所，方便清潔替換)。同兔兔講換廁廁俾你呀，一放個廁所入去佢就即刻跳上去VV ~.~。唔知佢諗乜呀，可能以為之前個個係床仔？換咗呢個先係廁所？好搞笑。

之後都好正常了，會中槍訓，冇再嬲我。怕佢整親傷口，圍咗一個細既地方(約三尺)、鋪玩樂墊，放佢出來舒展吓。

總結：

兔兔真係好固執架，習慣咗既嘢一變就會唔開心/唔習慣，例如：

- 放vetbed入佢個籠 狂抓，唔鐘意，覺得vetbed入侵佢個籠咁。又係vetbed上便便。要一段時間先勉強接受。
- 放草係vetbed上但大剖份時間都係食草盒既草。
- 鋪草係佢訓既地方等佢舒服d但 唔鐘意，推開先訓。

兔兔好需要人讚同鼓勵架，唔記得係邊度睇到，話千祈唔好將自己擔憂/負面既情緒俾兔兔知，唔好同兔兔話真係慘慘、陰公豬呢d負面說話，因兔兔都會受影響。所以呢兩日我不斷同佢講好快好番啦，叻叻豬呀，又同佢按摩頭仔，都好有用呀！ 加上兔仔絕育相對兔女只係一個小手術，所以好好彩好快復完！

將會帶兔兔絕育既兔媽/爸，加油呀！！

多謝你既分享呀!  真係好有鼓勵作用!

我下星期都會帶兔寶 (都係仔仔) 去絕育, 由打去 BOOK 個陣已經開始好擔心...
因為佢好曳周圍咬野, 又驚佢咬自己傷口唔知點算好...

TwowayBun 發表於 2013-10-3 11:42 AM
多謝你既分享呀!  真係好有鼓勵作用!

我下星期都會帶兔寶 (都係仔仔) 去絕育, 由打去 BOOK 個陣已經開始好 ...

我之前都好擔心架，唯有做足準備功父、鼓勵兔兔。
姑娘話D線係內線，"LAM"係唔會有事架。

祝絕育順利、兔兔早日康復！

遲下飛耳都要去, 不過佢依家4個月左右ONLY~ 但之前見分享既絕育文, 睇到有D驚囉~ 見到你呢篇文, 係開心既分享, 都好~