(24/5更新左最新情況+相) 森美腸停情況變差....不知所措!!!!!!!!

24/5
無論點餵,森美仔點都唔肯吞d草粉...
森美媽好不知所措,而佢今日既胃口亦冇琴日睇完醫生咁好...
草草都只係食少少少少,菜菜就唔肯食...
問左兔協既人
佢地話我針筒唔夠入,但我之前已經係好入的了..
佢地亦教我試下揉d草粉丸比森美睇下佢食唔食,可能佢唔like流質野

anyway,我會再努力嘗試!
森美仔,媽咪唔比你放棄呀!!!!!!


p.s 多謝jan jan媽的幫助和光之天使的問候,萬二分感激!


23/5
感謝各位的關心支持和鼓勵!
森美而家回復番精神,而且終於肯自己食少少草,食藥方面都好合作(因為甜甜的藥~_~)
唯一唔係咁樂觀既就係佢唔肯食草粉
就算d草粉吱左入口,佢都完全唔肯吞,任由d草粉自己漏番出黎...:016:
各位有冇遇過類似既情況?可以點樣令佢吞??:016: :016:

我會keep住幫佢按肚肚同埋逼佢食草粉,希望夜d食草粉既情況會有改善..!



22/5
點算好...
這兩天本來病情一直好轉..
而今日大圍度做day care果時e生都讚佢叻,好番好多,亦好精神
但番到屋企就變差哂...
一出袋就變波,又唔肯食草...
之前由唔肯食草到肯自己食草,但佢而家又唔肯食草..
連草粉都唔肯食
餵左入口都推番出黎...
我不停咁幫佢按摩肚仔
但都冇好轉..
由大圍番到黎7點幾,
一直都冇cc亦冇尿尿...
點算好...

我想聽日一早帶佢去九龍塘睇betty..
但呢3日森美已經來回大圍做day care,我驚佢太周車勞頓承受唔到..
九龍城果度一定係full booking...
前兩日森美腸停我打左過去佢一句話full booking就reject左我,我問佢地有冇walk-in個姑娘一句話冇就cut左我線...我好不知所措...點解會咁...
我應該點做好????????????????????????????????????????????????????????????????
佢死都唔肯吞d草粉,有冇辦法可以令佢肯吞???????????
救命呀!:050: :050: :050: :050: :050: :050:

[ 本帖最後由 happygirl2009 於 2010-5-24 01:29 PM 編輯 ]

我已經出動埋BB用既0.2ml針筒去餵佢
但佢好似放棄哂咁全完唔肯吞..就算我塞到支針筒好入佢都照由d草粉漏番出黎...
好似同我包拗頸咁唔肯吞

我一陣會再嘗試!!

我係打電話訂架,
我諗佢旺角門市都會有,
你可以打去問下

個草粉好似要 180
你買多少少野,可以叫佢送貨

加油!! 森美一定會肯吞d草粉的!!
努力, 唔好放棄!!

多謝各位!
森美終於都肯吞d草粉
而且餵佢食藥食草粉既過程都算順利
係唔知點樣可以令佢飲多d水

希望佢快d好番做番大隻森美仔仔啦!

thx all of you!!!!!!!!!

真係好喇！森美仔你要努力呀！森美媽，辛苦你喇！

肯食就好喇!
你不如試吓俾微暖o既水森美,
睇吓佢會唔會飲得多啲~
betty話飲暖水好架!

森美仔,你好返的未呀?

各位
森美仔而家情況好番好多啦
我終於都餵到佢食草粉
而家佢慢慢康復緊
肯自己食草,今日重好叻唔使我包佢毛巾,
自己一聽到聲就跑過黎要食草粉添!!!:061:
不過就重未肯自己飲水...
同埋cc都重係細粒,不過比起岩岩病果時d cc靚番好多了
希望佢快d肯自己飲番水啦!!

多謝大家關心和支持!

真係好la！#^27^#
森美仔，你要乖乖唔好嚇媽媽呀！
森美媽，繼續加油呀！

森美媽,
你試下係水樽口搽小小橙汁 (我指橙色的藥水),
放係佢口邊, 吸引佢飲水,
or 將個水樽放其他位置 or if 有 spare 水樽比佢用

如果都吾得, 你比橙汁佢飲時, 可以稀釋先
eg 1毫升橙汁  用 20-30 毫升水 稀釋 ,
少少甜, 兔兔都好中意飲

佢肯吾肯飲菜汁 ?

你教我的方法我也有試過啊~
稀釋果個方法森美最受落~
不過係水樽個口度點橙汁佢會飲一口,一冇左橙汁味就唔飲
個水樽我亦放左係另一個位置
不過佢都好似唔太飲咁
可能真係要買多一個水樽spare

d菜汁佢唔太飲...
不過我聽日試下搾另一種菜比佢飲!

謝謝你啊!!

最好係佢肯成條菜食, 菜汁對腸郁動幫助不算太大
當然乾草幫助更大, 加油啊~

菜菜佢肯食呀
不過比得太多驚唔驚佢會吸收得太多糖份??

另外森美而家精神好番好多
有番屎屎,今日果d又大粒左dd
肯食多d草同出外面(之前病果時only留係房入面)
但我有時幫佢按肚仔果時都feel都重係實實地
咁即係代表佢重有d腸停??

同埋我覺得佢病情有d反覆
每每一覺得佢有好轉好番好多,
但一睡左覺到左另一日
佢又會變番冇咁精神同冇咁肯食野> <

[ 本帖最後由 happygirl2009 於 2010-5-29 09:56 AM 編輯 ]

佢肯食返草就好啦, 肯食草就唔駛俾太多蔬菜
正常腸係好似面粉團咁軟林林

如果你仲feel到佢個肚有d硬~
可能佢腸入面仲有野kick住~
所以病情先反覆~

keep住幫佢按摩la~
加上佢依家又肯食d草~又有藥
再肯飲少少水加上你既按摩~
好快會郁返架喇~

加油呀~