兔兔成半年無食草啦..點算?

我隻兔寶貝而家３歲，但半年前就唔係好肯食草，
只係食糧，而且仲係早午晚３餐，
而家完全唔食草。

咁我８月９日開始就斷糧，
只係俾MOMI既1ST CUT 同新鮮既車前草俾佢，
佢食晒Ｄ車前草，食左５日度啦，
就都係唔多食草，只係食草碎，
不過佢就係咁飲水同尿尿，
呢２日仲好似腹瀉咁，嚇死我，
我即刻俾返糧佢食，因為佢真係唔肯食草，
又擔心咁樣餓佢會唔會有問題...
有咩辦法可以幫到佢呢？

糧我打算１日俾早晚同埋慢慢減少份量，
但就真係唔知點令佢肯食返草草。。。
希望大家幫幫我！！
:050::050:

如果你一直都寵慣佢食糧...
係好難改架~

要慢慢黎~唔可以一下子就斷糧
首先就係慢慢減少糧既份量,
無限量咁供應草,
(momi 1cut可能對某d兔兔黎講太硬, 或者買埋2nd cut黎溝or oxbow)
就算見佢唔係太食晒d草,都唔好因為咁而太快加返糧
要佢知道唔食草...就無野食~

btw...
點解會半年無食草架...
一開始點解突然會唔食草?
兔兔3歲,半年前先開始唔食草...即係一直都有食la?

momi 1cut可能對你隻兔寶貝黎講會太硬,同埋吾鐘意食。
我隻衰妺就淨食Jojo's or oxbow D 的草,枝就淨晒系度,俾衰妺激死!

1)　2nd cut同1st cut 有幾大分別呀?

2)　要佢知道唔食草...就無野食~
我剛剛係１星期都無俾糧佢，只俾草同新鮮車前草，但佢就只食車前草，加上佢有點腹瀉，瀉左２日度，雖然唔係瀉得好多好勁，但我怕佢一路咁瀉會體重下降...

3)　一直都有食~其實係一直有食,但就因為食水果呀食燕麥呀就開始少食，根住重唔食添

可能係都唔定，因為一向食開Q兔賣既草，
見佢唔多食就買momi試下點知都係唔食，
Jojo's or oxbow係有咩特別呀？

1cut既草會硬d,2cut既會軟d~
不過營養好似係1cut好d~

oxbow,jojo呢d即係其他牌子,
唔係話有咩特別...不過軟硬度會比較平均~

另外,其實我唔知點解你要比車前草兔兔食...醫生提議?
否則我都係建議你就咁比T草,等佢無得揀,
加上唔知係咪你放左車前草所以令佢肚瀉...正常食草應該反而唔會咁易肚瀉先岩..

水果!?太高糖份喇,你比D咩水果呀?幾耐比一次呀?
仲食埋燕麥??其實兔仔係唔應該食燕麥架!
你比埋咁多呢D零食兔兔,仲一日三餐糧...咁多好野食,
佢當然唔會食草啦....

樓主養左兔兔幾耐?3年都係由你照顧?

我諗係我太寵隻兔兔啦，我照顧左佢３年啦，
不過就唔係由細寵到大，都係年頭開始先俾多Ｄ佢，
燕麥就只係早上俾一茶匙度啦，所以佢就知有好野食唔吃草啦，
因為見佢完全唔食草所以先想佢食返，
水果蔬菜燕麥本來係BONUS，但而家就唔俾啦，
同埋我都想幫兔兔重新建立返正確飲食習慣，
所以就求救啦！

咁你一定要停晒所有零食先~

至於你話佢揀晒車前草食...
如果唔係vet建議要比兔兔食,
我諗你無需要加落去比兔兔

我會停晒佢的零食架啦，
至於草呢，我可能會試左2ND CUT 先，
睇下如何，
車前草都唔會再啦，
我想問下呢，
你地係點俾糧的份量呢？
如果我兔兔３歲又應該點俾法好呢？

兔兔是夜行動物, 所以,佢地最精神及最有食慾的時間是夜晚及晨早啊~~

零食一定要戎晒啦。我自己咁安排進食時間,覺得jacqueline係食得最多草的, 給你參考:

(籠內常存有至少1湯碗的草, 無就添)
8:00am  兔糧2平湯匙
2:00pm  蔬菜切碎半碗
7:00      兔糧2平湯匙
10:00    等於她身體2倍(壓實的)咁多timothy草 <<  通常呢堆草佢食到天光時,就會剩返少少

* 要定時餵食, 咁佢身體到進食時間就自然會餓會食草, 要幫佢養成好習慣。

唔知你隻兔幾大呢？
上網睇到話唔同年齡既兔有唔同的飲食需要，又係咪呢？
我諗我會參考下你個進食時間。
* 要定時餵食, 咁佢身體到進食時間就自然會餓會食草, 要幫佢養成好習慣。

我都係而家先知，原來係咁樣建立習慣，
不過我兔兔已經係自由行黎架啦，
放左佢出屋有成年啦，
佢而家除左尿尿之外都好少返入籠啦，
唔知咁會唔會影響佢對草的食慾需求呢？哈哈

唔好俾佢習慣食晒糧同水果,
因為呢兩樣都係高糖份既野,
醫生都唔主張食多,
話因為兔兔個胃既構造唔能夠容易消化糖份架

原帖由 VA16 於 2010-8-16 10:26 PM 發表
唔知你隻兔幾大呢？
上網睇到話唔同年齡既兔有唔同的飲食需要，又係咪呢？
我諗我會參考下你個進食時間。
* 要定時餵食, 咁佢身體到進食時間就自然會餓會食草, 要幫佢養成好習慣。

我都係而家先知，原來係咁樣 ...

我隻兔兔未夠一歲。我隻都算係自由行, 每天只係夜晚我睡覺時關籠門。由於餵任何食物都會放入籠, 所以她有肚餓就識走入籠搵草食。
如果你平時無將食物固定擺放,建議你將食物定時定刻放在籠入面, 咁樣都有助兔兔建立良好習慣。

我平時將食物固定擺放係佢個籠出面，
所以佢知邊個食野，
而家我諗緊每餐俾１湯匙定２湯匙好。。

其實好多vet都會建議減糧甚至戒糧~
泡泡7個月大時去body check
雖然佢好fit~但仍然建議減糧~
而家早晚一平匙